GLENO – Sesta-Feira, loron 28 fulan-Agusto 2015, S.E. Ministru Justisa, Ivo Valente, hala’o serimónia Tomada de Posse ba direjente ofisiais foun Ministériu Justisa nian iha área oeste (Munisípiu Liquisa, Bobonaro no Ermera). Tomada de Posse ne’e ba Diretór Konservatóriu Rejistu Notariadu munisípiu hamutuk nain-tolu, Diretór Terras Propriedade Munisípiu hamutuk ema nain-tolu, Diretór Diresaun Prizaun Munisípiu Ermera nian ema nain-ida iha ámbitu Ministériu Justisa iha Aula Administrasaun Munisípiu Ermera, Gleno.

Iha ninia diskursu, Ministru Justisa, Ivo Valente hateten; tomada posse ba dala-tolu ne’e hala’o depois-de assume kna’ar hanesan Ministru Justisa nian iha VI Governu Konstitusionál, signifika, Governu ida ne’e fó nia konfiansa bót ba imi hodi foti kna’ar nu’udar direjente importante iha Ministériu Justisa nian, tanba, hatene di’ak tebes ona imi-hotu nia kapasidade tékniku, méritu no lealdade ba instituisaun no povu rai ida ne’e. Ho orgullu, ha’u hakarak hato’o mós obrigadu barak ba Komisaun Funsaun Públika (KFP) ne’ebé fó suporta ba prosesu nomiasaun tomak ba direjente Ministériu Justisa ho nune’e ita bele hakat ba iha loron importante ida ne’e.

“Konfiansa ne’e nu’udar todan mak naha ona iha imi-nia kaba’as leten, maibé ha’u fiar imi sei servisu maka’as liután, tanba ha’u koñese di’ak imi-hotu, ha’u hamutuk ona ho imi liu ona tinan-lima, imi merese atu simu konfiansa hosi Governu hodi assume kargu diretór iha munisípiu. Tanba-ne’e, simu konfiansa ne’e ho servisu di’ak ba povu, atende ho professional ba ita-nia povu sira, liuliu sira ne’ebé laiha kbiit atu to’o iha ita-nia fatin servisu. Por ezemplu, bele halo atendimentu offline ba Bilhete Identidade ba ita-nia katuas, ferik no sira ne’ebé mak la-posivél atu bele to’o iha Edifísiu Notariadu, nune’e ha’u apela ba Diretór Konsertavatóriu sira atu halo atendimentu offline, katak imi tenke ba iha sira-nia fatin ida-idak hodi halo atendimentu ba sira,” apela Ministru Justisa ba emposadu sira.

Ivo Valente hatutan, ita-bót sira mak sai responsavél maximu Munistériu Justisa nian iha munisípiu Ermera, Liquisa no Bobonaro, tanba-ne’e, tenke servisu ho laran tomak sem razaun, ne’e mak sei hatudu imi-nia esforsu; hanesan Ermera oan, Liquisa oan no Bobonaro oan, imi servisu ba ita-nia povu rasik, kuandu la halo esforsu oioin hodi responde nesessidade povu nian, konfiansa sira ne’e sei monu de’it ba rai. Tinan 1 ka 2 oin mai sei simu tán delegasaun kompetensia nune’e tenke sai exemplar ba povu, pelu menus hatudu imi-nia servisu di’ak ba povu katak, imi bele jere ita-bót sira nia munisípiu ida-idak. Hanesan responsavél maximu munisípiu, tenke esforsu mós solusiona problema ne’ebé ita-bót sira infrenta, maské ita-bót sira iha rekursu umanu no fasilidade ne’ebé sei minimu tebes, maske nune’e ita tenta buka nafatin hodi rezolve neneik tuir kbiit Estadu nian.

Hodi hakotu ninia diskursu, Ministru Justisa Ivo Valente, hato’o-nia parabéns ba emposadu sira, hodi dehan mós katak, “saída” mak emposadu sira hetan nu’udar esforsu sira-nia familia ida-idak, tanba familia indireitamente mós fó sira-nia kontribuisaun ba sira-nia kareirra.

“Parabéns ba imi-nia familia hotu, obrigadu barak ba tebes ba apoiu durante ne’e, ha’u husu favór bót atu kontinua fó imi-nia apoiu ba imi-nia fen ka laen ne’ebé simu kna’ar foun ohin;” agredese Ivo Valente ba emposadu ho nia-familia sira.

Iha fatin hanesan, Diretór Jeral Ministériu Justisa, Henrique de Oliveira Ximenes hateten, agradese ba prezensa Sua Excelénsia Ministru Justisa Dr. Ivo Valente no Komisária Komisaun Funsaun Públika (KFP) Dra. Olandina Caero iha tomada de posse ba direjente ofisiais iha ámbitu Ministériu Justisa iha Munisípiu Ermera.

Ha’u hato’o bem-vindu ba imi-hotu atu sasin ba emposadu sira, familia tantu autoridades lokál Munisípiu Ermera, Bobonaro no Liquisa iha serimónia tomada de posse daruak iha nivél munisípiu sira.

“Ha’u hakarak informa ba Señor Ministru Justisa no Komisária KFP katak, tomada de posse ne’e ba daruak nian iha nivél munisípiu, foin dadaun Ministériu Justisa halo ona iha Manatuto hodi reprezenta munisípiu parte leste nian, agora daruak ne’e iha Munisípiu Ermera, iha ne’e, hodi reprezenta parte oeste nian no sei iha serimónia tomada de posse ba datolu (ikus) iha Munisípiu Covalima, Same iha tempu besik mai;“ hateten Diretór Jeral Ministériu Justisa, Henrique de Oliveira Ximenes.

Serimónia Tomada de Posse ba direjente ofisiais foun Ministériu Justisa iha Munisípiu Ermera partisipa hosi Membru Parlamentu Nasionál Antonio Lima-Lima, Komisária KFP Dra. Olandina Caero, Defensór Públiku Jerál Dr. Sergio Hornai, Diretór Jerál Ministériu Justisa Dr. Henrique de Oliveira Ximenes, Diretora Centro Formação Jurídica (CFP) Dra. Marcelina Tilman, Amo Paróko Ermera Padre Deonizio Carvalho, Administradór Interino Munisípiu Ermera, Inspetór Jerál Dr. Lucas da Costa, Presidente Asosiasaun Veteranus no Antigu Kombatantes Xéfe Gabinete Ministru Justisa Dr. Evangelino Belo no Xéfi Gabinete Sekretáriu Estadu Terras Propriedades Dr. Marciano Barreto, Diretór Nasionál sira, Diretór Munisípiu no Xéfi Departementu, autoridade lokál, familia emposadu sira no konvidadu sira.

Solange Pires
Mídia Gabinete Ministru Justisa
Ministériu Justisa