SAME –Kuarta-Feira, loron 02 fulan-Setembru 2015, S.E. Ministru Justisa, Ivo Valente, hala’o serimónia Tomada de Posse ba direjente ofisiais foun Ministériu Justisa nian iha parte sentru (Munisípiu Manufahi, Aileu, Ainaro no Covalima). Tomada de Posse ba Diretór Konservatóriu Rejistu Notariadu hamutuk ema nain-hat, Diretór Terras Propriedade Munisípiu hamutuk ema nain-hat iha Salaun Terras Propriedades Munisípiu Manufahi, Same.

Tomada de posse iha Same, Munisípiu Manufahi ba dala ikus nian ba direjente ofisiais Ministériu Justisa ne’ebé foti kna’ar iha munisípiu 13 ba tinan rua oin mai, ofisiais sira kompostu hosi konservatóriu notariadu, terras propriedades, servisu prizaun no reinsersaun sosiál, defensoria, etc. Direjente ofisiais munisípiu ne’ebé simu ona posse ba kargu xéfia iha munisípiu no diresaun iha tinan 2015, ofisiais balun eskolha foun no mós balun tán simu kna’ar extensaun de’it ba nia kargu tuan.

Prosesu tomada de posse ne’ebé halo hosi Ministru Justisa, Ivo Valente iha munisípiu sira sempre hetan akompañamentu hosi Komisáriu sira hosi Komisaun Funsaun Públiku no autoridade lokál sira nu’udar sasin ba serimónia ne’e. Iha biban hirak ne’e, rona mós desizaun Funsaun Públiku ba nomiasaun kargu setór públiku ne’ebé funsionáriu públiku sira simu iha ámbitu Ministériu Justisa nian.

Iha serimónia ikus fó posse ba direjente ofisiais sira iha Same, Munisípiu Manufahi, Ministru Justisa Ivo Valente iha ninia diskursu hateten, prosesu selesaun ba kandidatura ne’e liu hosi prosesu naruk tebes, ha’u dehan ba imi-hotu, nomeasaun hahu mai hosi ita-bót sira nia superiór tuir ita-bót nia meritu, dezenpeñu, profesionalidade no lealdade.

Ha’u laiha interese pesoal, ba interese ha’u partikulár “la’e” ka benefísiu partidaria “la’e” ka atu hetan benefísiu ruma ba ha’u nia án rasik, maibé, interese mak diretór foun sira bele benefísia ba dezenvolvimentu setór públiku, liuliu setór justisa nian ne’ebé sai interese no esperansa bót ba ita-nia povu no estadu nian.

Tuir Planu Estratéjiku Setór Justisa 2011-2030, por etapa ita tenke kumpri atu nune’e atinzi indikadores mak ita planeia por anuál, emposadu sira hanesan reprezentasaun maximu Ministériu Justisa iha Munisípiu Manufahi, Aileu, Ainaro no Covalima; tanba-ne’e, imi-hotu tenke halo planu asaun ne’ebé konkritu tuir ita-nia planu estratéjiku ne’ebé ita trasa ona, konsulta ho autoridade lokál, tokoh adat (lider tradisionais) no ita-nia povu; hateten Ministru Justisa, Ivo Valente.

“Ha’u enkoraza nafatin imi-hotu, emposadu sira atu labele moe hodi besik tokoh adat (lider tradisionais) sira no besik autoridade lokál sira, koa’lia ho sira no husu sira nia hanoin kona-ba “oínsa” halo planu di’ak ba povu no “oínsa” rezolve problema lokál nian. Ha’u hatene tebes, ita-nia tokoh adat sira maske la-eskola bót maibé sira nakonu ho matenek no esperiénsia moris sosiedade nian, ne’ebé, ha’u husu imi atu besik nafatin sira no husu tulun atu nune’e imi kuandu halo planu ba munisípiu tuir realidade no nessesidade ne’ebé povu infrenta dadaun,” enkoraza Ministru Justisa ba emposadu sira.

Hodi hakotu nia diskursu, Ministru Justisa fó nia obrigadu barak ba prezensa Komisáriu Komisaun Funsaun Públiku Dr. Jose Telo, Administradór Munisípiu Manufahi, Presidente Asosiasaun Veteranus no Antigos Combatantes Munisípiu Manufahi, Xéfi Suku sira, autoridade lokál sira, Diretór Jeral Ministériu Justisa, Inspetór Jerál no familia emposadu sira. Ministru Justisa hato’o mós parabéns ba emposadu no parabéns ba familia emposadu sira, ha’u husu atu fó imi-nia apoiu nafatin atu nune’e imi-nia la’en, aman bele hala’o nia kna’ar di’ak tuir ita-hotu nia espetasaun.

Iha biban ne’e, Diretór Jerál Ministériu Justisa Dr. Henrique de Oliveira Ximenes informa katak, Ministériu Justisa hala’o tomada de posse ne’e ba dala ikus nian iha tinan 2015, objetivu hosi tomada de posse atu responde polítika VI Governu Konstitusionál nian atu hametin no harmoniza estrutura Governu nian maiz real ba munisípiu sira hodi nune’e iha futuru sei fó apoiu ba prosesu desentralizasaun.

Ministériu Justisa hala’o ona tomada de posse ba nia direjente ofisiais iha tinan 2015 hahu kedan hosi parte leste (Lautem, Baucau, Viqueque no Manatutu) ne’ebé lokalizada iha Manatuto, parte oeste (Ermera, Liquisa no Bobonaro) iha Manatuto, nune’e, ohin iha parte sentru nian ne’ebé mak konsentra iha Munisípiu Manufahi, agradese no apresia tebes tanba hetan prezensa hosi Sua Exclénsia Ministru Justisa no Komisáriu Komisaun Funsaun Públika iha oportunidade importante ida ne’e; aumenta Diretór Jerál Ministériu Justisa.

Serimónia Tomada de Posse ba direjente ofisiais foun Ministériu Justisa iha Munisípiu Manufahi partisipa hosi Komisáriu KFP Dr. Jose Telo, Diretór Jerál Ministériu Justisa Dr. Henrique de Oliveira Ximenes, Amo Paróko Suai, Administradór Munisípiu Manufahi, Inspetór Jerál Dr. Lucas da Costa, Presidente Asosiasaun Veteranus no Antigos Kombatantes, Xéfe Gabinete Ministru Justisa Dr. Evangelino Belo no Xéfi Gabinete Sekretáriu Estadu Terras Propriedades Dr. Marciano Barreto, Diretór Nasionál sira, Diretór Munisípiu no Xéfi Departementu, autoridade lokál, lider tradisionais, familia emposadu no konvidadu sira.

Solange Pires
Mídia Gabinete Ministru Justisa
Ministériu Justisa