DILI, MJ – Kuarta-Feira, loron 03 fulan-Setembru 2015, S.E. Ministru Justisa, Ivo Valente prezide reuniaun Konsellu Konsultivu Ministériu Justisa iha Salaun Reuniaun Ministériu Justisa, Dili.

Ajenda reuniaun ne’e mak, halo diskusaun ba prosesu implementasaun aktividade no ezekusaun orsamentu Ministériu Justisa nian ba tri-mestre datoluk nian ba Tinan Sivíl 2015 no mós diskute preparasaun kona-ba Diagnóstika Nasionál ne’ebé mak sei halo ba Ministériu Justisa iha loron 07-10 Setembru 2015 hosi Sekretáriu Estadu Fortalesimentu Institusionál (SEFI) no seluk-seluk tán.

Ministru Justisa nu’udar mós Presidente Konsellu Konsultivu fó oportunidade uluk ba Diretór-Jerál hodi aprezenta diresaun jerál nia relatóriu ativividade iha fulan-tolu ikus no nia dezempeñu ezekusaun orsamentu, depois kontinua ho relatóriu Gabinete Inspesaun no Auditória ne’ebé aprezenta hosi Inspetór-Jerál kona-ba rezultadu audit no inspesaun ne’ebé sira halo iha nivél nasionál to’o iha munisípiu, nune’e mós asaun mak tenke foti ba rezultadu audit nian. Kontinua ho diresaun nasionál sira aprezenta sira-nia atividade no progressu ezekusaun orsamentu.

Iha aprezentasaun ikus, Diretór Nasionál Diresaun Administrasaun no Finansas (DNAF), Crisogno da Costa Neto informa, taxa ezekusaun orsamentu Ministériu Justisa em global (akumuladu) atinzi ona 57%, taxa ne’e sei kiik tanba despeza barak mak seidauk halo pagamentu, dadaun iha prosesu nia-laran no iha fulan rohan ne’e bele atinzi ona liu 70% ezekusaun.

Ministru Justisa Ivo Valente iha ninia intervensaun ba relatóriu hirak ne’e hateten, ita-nia taxa ezekusaun sei kiik tebes, ha’u husu ba diretór sira iha diresaun hotu-hotu atu servisu extra-ordináriu nune’e aselera lalais ezekusaun ba atividade Ministériu Justisa nian,

hela fulan-tolu ba ezekusaun atividade no orsamentu, ita-nia ezekusaun tenke ultra-passa 90%, maibé labele haluha atu kontrolla nia kualidade hodi nune’e tuir nafatin indikadór no meta ne’ebé ita planeia tiha ona atu atinzi iha tinan ida ne’e.

“Ita-bót sira tenke servisu maka’as liután iha fulan-tolu ne’e, maibé ha’u husu atu imi labele halo mudansa ba atividade sira, ita-bót sira tenke la’o tuir nafatin planu mak ita traza ona, “saída” mak ita planeia ona hala’o mak ida ne’e, labele inventa sasan, tanba kuandu iha mudansa ba atividade sei afeita mós ba orsamentu no prejudika mós ita-nia ezekusaun,” apela Ministru Justisa.

Reuniaun Konsellu Kosultivu ne’e partisipa hosi Diretór-Jerál Henrique de Oliveira Ximenes, Inspetór-Jerál Lucas Antonio da Costa, Diretora CFJ Marcelina Tilman da Silva, Xéfe Gabinete Ministru Justisa Evangelino Belo, Xéfi Gabinete Sekretáriu Estadu Terras Propriedades Marciano Barreto, Sub-Inspetór GIA Antonio Fatima, Diretór Nasionál DNDHC Celito Cardoso, Diretór Nasionál DNAJL Nelinho Vital, Diretór Nasionál DNRN Maria do RFC de Araújo, Diretór Interino DNSPRS Demetrio no Diretór Nasionál DNTPSC Romão Guterres no Xéfi Departementu Gabinete Diresaun Jerál.

Maria de Lourdes Lin
Media Officer
Gabinete Ministru Justisa