DILI – Tersa-Feira, loron 08 fulan-Setembru 2015, S.E. Ministru Justisa Ivo Valente simu audiénsia ho Organizasaun Naun-Governamentál (ONG) Belun hodi fahe informasaun iha área prevensaun konflitu no koalia posibilidade kooperasaun entre Governu ho sosiedade sivíl ba kestaun rezolusaun disputa rai. Audiénsia ne’e hala’o iha Sala Reuniaun Gabinete Ministru Justisa, iha Edifísiu Ministériu Justisa, Kaikoli, Dili.

Ministru Justisa, Ivo Valente iha nia-liafuan abertura ba audiénsia ne’e hateten, ha’u agradese ba sosiedade sivíl sira, apresia mós ho ita-bót sira iha ONG Belun nia esforsu tomak, tanba durante ne’e fó ona ajuda direitamente ba Governu liu hosi Diresaun Nasionál Terras Propriedades no Servisu Kadastrál (DNTPSC) hodi promove mediasaun ba rezolusaun disputa rai ne’ebé akontese iha ita-nia komunidade nia le’et, nu’udar Ministru Justisa, sei kontinua fó komitmentu hodi kolabora nafatin ho sosiedade sivíl sira.

Diretór ONG Belun, Luis da Costa Ximenes informa katak, hahu tinan 2008 NGO Belun halo ona kooperasaun ho Ministériu Justisa no foti parte iha ekipa mediasaun, meius ba rezolusaun konflitu Programa Ita Nia Rai, no iha oportunidade ne’e, Diretór ne’e husu atu halo tán nota intendimentu (MoU) ida hodi re-ativa parseriedade sosiedade sivíl (ONG Belun) ho Ministériu Justisa hodi foti papel ba rezolusaun konflitu relasaun ho disputa rai iha Timor-Leste, tanba-ne’e, sira submete mós esbosu MoU ba Ministru Justisa hodi estuda uluk no loke espasu ba akordu kooperasaun iha futuru.

Programa mediasaun disputa rai, kuandu iha ona akordu nune’e karik iha disputa rai, ONG Belun sei tu’un no bolu parte konflitu sira ho autoridade lokál atu tu’ur hamutuk hodi rezolve, aliénde ne’e mós, ho programa ne’e ONG Belun sei fahe informasaun ba komunidade sira; aumenta Diretór ONG Belun.

Relasaun ho MoU entre Ministériu Justisa no ONG Belun, Ministru Justisa hateten, sei estuda esbosu proposta MoU ne’e, depois sei foti desizaun.

Audiénsia ne’e partisipa hosi ekipa hosi ONG Belun ne’ebé lidera hosi nia-diretór no Xéfi Gabinete Ministru Justisa, Evangelino Belo.

Maria de Lourdes Lin
Media Officer
Gabinete Ministru Justisa