DILI, MJ – Kuartu-Feira, 09 fulan-Setembru 2015, S.E. Ministru Justisa Ivo Valente prezide reuniaun Konsellu Superiór ba Polísia Sientífika Investigasaun Kriminál (PSIK) iha Sala Reuniaun Ministériu Justisa, Kaikoli Dili.

Reuniaun ne’e partisipa hosi membru Konsellu Superiór PSIK mak hanesan, Ministru Interiór Dr. Longuinhos Monteiro no Ministru Defeza Dr. Cirilio Cristovão no mós involve Prokuradór Jerál Dr. José da Costa Ximenes.

Ministru Justisa, Ivo Valente hanesan mós Presidente ba Konsellu Superiór PSIK hato’o nia bem-vindu, obrigadu no apresiasaun ba konsileiru sira ne’ebé simu konvite no fó biban hodi partisipa iha reuniaun ba Konsellu Superiór PSIK nian.

Ha’u admite atu le’e ajenda reuniaun ohin nian katak, ita sei diskute asuntu krusiál no importante balun kona-ba progressu servisu PSIK nian, prosesu rekrutamentu ba investigadór foun ba Polísia Sientífika Investigasaun Kriminál, servisu PSIK nian iha tempu oin mai no mós asuntu seluk tán; persebe Ministru Justisa wainhira atu hahu reuniaun.

Reuniaun fechada ne’e hala’o durante iha oras-ida ho balun nia laran, hahu hosi tuku 10:00 to’o 11:30 meudia.

Maria de Lourdes Lin
Media Officer
Gabinete Ministru Justisa