DILI, CFJ – Kinta-Feira, loron 10 fulan-Setembru 2015, S.E. Ministru Justisa, Ivo Valente ensera Diagnóstika Nasionál ba Fortalesimentu Institusionál ba Ministériu Justisa iha Centro Formação Jurídika (CFJ) Kaikoli, Dili.

Ministru Justisa, Ivo Valente iha ninia apresiasaun ba prosesu diagnóstika nasionál durante loron-hát ne’e hateten, ha’u-nia impresaun pozitivu tebes ba diagnóstika ne’ebé mak halo ona ba Ministériu Justisa, tanba kontribui atu hasai figura ultima ba prosessu servisu ne’ebé mak ita hala’o durante ne’e, ne’e mak ita, di’ak ka át ne’e mak ita-nia situasaun agora, ita tenke simu kritika sira atu hadiak án iha futuru.

“Ha’u hakarak dehan ba ita-bót sira, saída mak Ministériu Justisa hetan agora, ne’e tanba esforsu sira hahuluk ona ha’u (le’e: ministros sira uluk), sira-nia produtu iha tinan 4 ka tinan 5 liubá mak halo ohin ita bele hanesan ne’e, ita tenke agredese ba sira, sira mak lori ita-hotu ba progresu di’ak ne’e, ha’u só mai hatutan de’it, importante mak ita-hotu tenke kontinua servisu maka’as liután no hadiak án nafatin,” hateten Ministru Justisa.

Ha’u mós agradese no apresia Sekretária Estadu Fortalesimentu Institusionál (SEFI), Sr. Francisco da Costa Soares ho ninia ekipa tomak, ita-bót sira hatudu ona mai ami kona-ba saída mak ami-nia orgullu no fó biban mós ba ami atu hadia instituisaun ida ne’e ho ninia ema sira di’ak liután, ami presiza hadia buat barak, tanba-ne’e, ami presiza imi-nia tulun nafatin, ami presiza imi-nia matenek no kritika hodi nune’e ami hadia di’ak liután ministériu ida ne’e; hatutan Ministru Justisa, Ivo Valente.

Iha ninia intervensaun ikus, Ministru Justisa hateten tán, iha ne’e, kuaze direjente ofisiál tantu nasionál no munisípiu halibur hamutuk iha Centro Formação Jurídica iha loron-hát nia laran, momentu ne’e oportunu hodi halo avaliasaun profunda ba servisu ne’ebé ita hala’o ona no hanoin sá planu oin mai.

Nune’e, sei ita-nia servisu la-perfeitu ita tenke hadia, ita-nia hasoru malu ne’e mós tenke agradese, tanba “jarang-jarang - dalaruma de’it” mak iha oportunidade hanesan ne’e, aliénde halo servisu, ita-hotu iha momentu hodi koñese malu di’ak liután, apela Ministru Justisa.

Partisipa iha Diagnóstika Nasionál ida ne’e mak direjente ofisiais ema hamutuk 107 ne’ebé asumi kargu diresaun sira no xéfia mak hanesan; Diretór-Jerál, Defensoria Públiku-Jerál, Inspetór-Jerál no Sub-Inspetór sira, Diretora Centro Formação Jurídica (CFJ), Polísia Siéntifika Investigasaun Kriminál (PSIK), Diretór Nasionál sira, Diretór nivél munisípiu ba 12 Municípios no Diretór sira hosi Região Administrativa Espesiál de Oecusse, Xéfi Departementu sira, Xéfi Gabinete Ministru Justisa, Xéfi Gabinete STP, tékniku profesionais superiór sira no Assessores Nasionál iha ámbitu Ministériu Justisa.

Diagnóstika Nasionál ba Fortalesimentu Institusionál ba Ministériu Justisa hosi Sekretáriu Estadu Fortalesimentu Institusionál (SEFI) hala’o durante loron-hát, hahu hosi loron 07-10 Setembru 2015.