DILI – Sesta-Feira, loron 11 fulan-Setembru 2015, S.E. Ministru Justisa Ivo Valente ho ninia ekipa aprezenta pakote proposta orsamentu Ministériu Justisa tinan fiskál 2016 nian ba Komité Revizaun Orsamentál (KRO) iha Sala Reuniaun Ministério das Finanças.

Antes Ministru Justisa aprezenta orsamentu Ministériu Justisa nian, S.E. Primeiru-Ministru Dr. Rui Maria de Araújo nu’udar Presidente KRO esplika lakuna orsamentu ne’ebé Ministériu Justisa tenke hadia, no husu atu halo esplikasaun detaillu ba dotasaun alokadu balun.

Tuir mai, Ministru Justisa aprezenta dotasaun ba proposta ne’ebé Ministériu Justisa simu no planeia iha tinan 2016 mak hanesan; Saláriu no Vensimentu hamutuk miliaun $4,187.40 dolár amerikanu, Bens Servisu hamutuk milaiun $14,275.60 dolár no kapitál Menór hamutuk rihun $450.00 dolár. Ministru Justisa mós esplika lakuna sira no halo justifikasaun ba hahusuk ne’ebé membru KRO sira-nia perguntas kritiku sira.

Aliénde aprezenta pakote orsamentu ne’ebé atribui ba iha Ministériu Justisa, Ministru Justisa mós aprezenta orsamentu adisionál hamutuk miliaun $1,125.93 dolár. Hafoin diskusaun remata, KRO aprova proposta orsamentu Ministériu Justisa tinan fiskál 2016.

Nune’e, proposta orsamentu Ministériu Justisa nian ne’e aprova ho montante osan hamutuk miliaun $20,038.93 dólar amerikanu, inklui ona ho proposta adisionál, maské nune’e, KRO hatudu mós liña balun hodi esklarese di’ak liután iha diskusaun separadu ida.

Relasaun ho Fundu Dezenvolvimentu Kapitál Umanu (FDKU) no Kapitál Dezenvolvimentu (KD) sei jere hosi komisaun separadu no sei halo diskusaun ketak antes lori ba debate iha Parlamentu Nasionál; informa Ministru Justisa ba Mídia Gabinete Ministru Justisa depois-de remata reuniaun ba diskusaun orsamentu Ministériu Justisa nian ho Komité Revizaun Orsamentál.

Akompaña Ministru Justisa mak; Secretário Estadu Terras e Propriedades (SETP), Diretór Jerál Ministériu Justisa, Defensór Públiku Jerál, Inspetór Jerál Ministériu Justisa, Diretora Centro Formação Jurídika (CFJ), Diretór Nasionál PSIK, Diretór Nasionál DNAF, Diretór Nasionál DNPRS, Diretór Nasionál DNDHC, Diretór Nasionál DNDAL, Diretora Nasionál DNRN, Diretór Nasionál DNTP, Xéfi Gabinete Ministru Justisa, Xéfi Gabinete SETP, Xéfi Departementu sira iha ámbitu Ministériu Justisa.