DILI – Seguda-Feira, loron 14 fulan-Setembru 2015, S.E. Ministru Justisa Ivo Valente halo reuniaun ho Xéfi Departementu Information Technology (IT) Inocencio Alves, Responsavél Networking Pedro Antonio de Deus Ministériu Justisa iha Gabinete Ministru Justisa.

Ministru Justisa Ivo Valente hateten, ha’u hakarak koalia ho ita-bót sira, reuniaun ne’e ha’u mak inisia, aliénde atu hatene servisu IT nian, ita sei koalia kona-ba posibilidade IT nu’udar diresaun ketak ida, sá planu dezenvolvimentu rekursu umanu ba funsionáriu IT nian no asuntu kapasitasaun espesífiku balun, nune’e mós ha’u mós hakarak hatene estratéjia publikasaun ba atividade sira no jestaun website Ministériu Justisa nian mak la’o durante ne’e.

Ita-nia hasoru malu ida ne’e importante, tanba servisu ba área IT importante tebes ba Ministériu Justisa, liuliu ba sira ne’ebé funsionáriu permanente mak ho esforsu maka’as ajuda Ministériu Justisa, tanba-ne’e, ha’u bolu imi atu hatene imi-nia kapasidade to’o iha ne’ebé ona no ha’u sei buka meius apoiu, no importante liután mak hatene mós ita-nia siguransa database no rede internet ne’ebé ita uza dadaun,” aumenta Ministru Justisa.

Iha biban ne’e, Xéfi IT Inocencio Alves ho Pedro Antonio de Deus esplika ba Ministru Justisa kona-ba servisu rede Ministériu Justisa nian, seguransa database, servisu website no saída mak presiza hodi hasa’e kapasidade funsionáriu IT nian.

Ami presiza aumenta liután koñesimentu iha área rede nian (networking) tanba relasaun ho servisu inter-diresaun, konesaun no mós funsionamentu rede ba servisu públiku nian, por ezemplu, produsaun BI, passaporte, sertidaun RDTL, IIMS no sel-seluk tán; esplika Xéfi Departementu IT, Inocencio Alves.

Iha ninia intervensaun ikus, Ministru Justisa husu Xéfi IT ho ninia ekipa atu halo estudu kona-ba tipu formasaun mak IT Ministériu Justisa presiza, nivél formasaun, ba sé de’it no ema nain hira; haruka proposal ne’e mai ha’u, ha’u sei buka meius atu funsionáriu IT sira hetan formasaun propiu, hodi nune’e, ita labele depende nafatin ba ema seluk, katak, ita-nia IT tenke halo ona timorizasaun.