DILI– Tersa-Feira, loron 15 fulan-Setembru 2015, S.E. Ministru Justisa Ivo Valente tuir reuniaun Konsellu Administrasaun Fundo Infra-estrutura (KAFI) iha Aula Konferénsia Ministériu Obras Públika, Transporte no Komunikasaun (MOPTC), Kaikoli, Dili.

Iha reuniaun KAFI ne’e, Prezidente Meza em ezersisiu Ministru Obras Públiku, Gastão Sousa fó oportunidade ba ekipa tékniku projetu bót sira KAFI hodi aprezenta situasaun ezekusaun no fundu infra-estrutura tinan 2015 no orsamentu ba fundu infra-estrutura 2016 nian. Aprezentasaun ne’e, foka liu ba tipu projetu, kestaun projetu sira mak halo ona pagamentu, pagamentu pendente sira no obrigasaun kontratu sira mak tenke hala’o.

Depois de aprezentasaun KAFI, kontinua ho aprezentasaun Anjénsia Dezenvolvimentu Nasionál (ADN) ne’ebé foka liu ba situasaun ezekusaun projetu infra-estrutura liña ministériu sira ne’ebé tama ba faze dezeña, implementasaun, monitorizasaun, prosesu pagamentu em montante/ prosentajem no mós kestaun sira mak hasoru iha kampu.

Iha biban ne’e mós, Komisaun Aprovizionámentu Nasionál (KAN), aprezenta mós relatóriu progresu aprovizionamentu ba projetu sira iha tinan 2015.

Hafoin aprezentasaun, meza loke ba diskusaun no husu kada ministériu no instituisaun idak-idak atu halo apresisaun no intervensaun ba situasaun ezekusaun projetu infra-estrutura ne’ebé la’o dadaun.

Ministru Justisa, Ivo Valente nia-intervensaun ba projetu fiziku rua tinan 2015 ba Ministériu Justisa, katak, Edifísiu Foun ba Tribunál Rekursu no Tribunál das Kontas, no Edifísiu Polísia Sientifíku Investigasaun Kriminál (PSIK) nian presiza ne’ebé agora dadaun iha ona prosesu kontratu ba kompañia, ita tenke em konsiderasaun ba implikasaun kontratu legál sira.

Aliénde projetu bót rua mak mensiona iha leten, Ministru Justisa informa mós kona-ba projetu Edifísiu Ministériu Justisa ne’ebé tama ona faze ikus nian, tuir kontratu katak sei remata no entrega iha fulan-Dezembru 2015 hosi kompañia. Situasaun finalizasaun projetu agora hela de’it perfurasaun bee-mós ba edifísiu no konesaun eletridade, tanba edifísiu Ministériu Justisa presiza enerjia eletrika ne’ebé bót tebes, nune’e KAFI sei buka rezolve depois-de debate orsamentu tinan fiskál 2016 nian.

Maria de Lourdes Lin
Media Officer
Gabinete Ministru Justisa