DILI, CFJ – Kuarta-Feira, loron 16 fulan-Setembru 2015, S.E. Ministru Justisa, Ivo Valente prezide reuniaun preparasaun atu submete relatóriu situasaun labarik Timor-Leste ba iha Jenebra iha Centro Formação Jurídica (CFJ), Kaikoli, Dili.

Hanesan estadu-parte mak ratifika Konvensaun Internasionál kona-ba Direitu Labarik (KDL) nian iha fulan-Dezembru 2002, Timor-Leste iha obrigasaun hodi implementa no halo relatóriu ba Komité Direitu Labarik iha Jenebra. Reuniaun ne’e koa’lia kona-ba materia mak atu submete no fahe tarefa iha área monitorizasaun ba labarik, saúde no edukasaun.

Ministru Justisa Ivo Valente ne’ebé akompaña hosi Vise-Ministra Edukasaun, Dra. Dulce de Jesus Soares hateten, ha’u konvida ita-bót sira mai iha ne’e atu diskute kestaun sira ne’ebé mak ita-nia labarik hasoru dadaun, hanesan Governu progresu “saída” mak ita halo ona, antes ita submete relatóriu ba Komité Nasões Unidas ba Direitu Labarik iha Jenebra.

Koalia kona-ba direitu labarik, Timor-Leste hanesan Estadu Parte sei iha prosesu hadia sasan barak, maske sei hasoru violasaun ba labarik sira; por-ezemplu, ita sei hare’e servisu obrigatóriu ba labarik ho tinan minoridade hosi inan-aman rasik, kazu balun kona-ba abuzu seksuál ba labarik sira, asesu ba saudé, asesu edukasaun, labarik abandonadu hosi inan-aman rasik no labarik barak seidauk hetan liberdade no goza tuir Konvensaun Deireitu Labarik define ona, no mós situasaun seluk ne’ebé labarik Timor-oan hasoru.

Hodi submete relatóriu ne’e, Ministru Justisa Ivo Valente mak sei Xéfia Delegasaun liña-ministériu ne’ebé mak sei halo aprezentasaun relatóriu iha Jenebra hosi loron 19-25 fulan-Setembru 2015.

Partisipa iha reuniaun ne’e mak, direjente Diresaun Nasionál Direitus Umanus no Sidadnia (DNDHC) Ministériu Justisa, Celito Cardoso, Vise-Ministra Edukasaun Dra. Dulce de Jesus Soares, Komisária Komisaun Direitu Labarik Maria Barreto, Diretora MSS Antonia Carmen da Cruz, SEPFOPE, MNEK, UNICEF, Xéfi Gabinete Ministru Justisa Evangelino Belo no Assessores internasionál no nasionál.

Maria de Lourdes Lin
Media Officer
Gabinete Ministru Justisa