DILI, MAE – Kinta-Feira, loron 08 fulan-Otubru 2015, S.E. Ministru Justisa Ivo Valente partisipa iha reuniaun inter-orgánika Coordenadoção dos Assuntos da Administração do Estado e da Justiça iha Salaun VIP Ministériu Administrasaun Estatal, Dili.

Ajenda prinsipál mak lori ba iha reuniaun ne’e mak; guia de estilos karta ofisiál (matadalan ba uniformizasaun karta korespondénsia), proposta Planu Asaun Anuál (PAA) Tinan Sivíl 2016, aprezentasaun dezempeñu ezekusaun programa no orsamentu tinan 2015, planu reforma administrasaun públika no preparasaun komemorasaun 500 anos enkontru sivilizasaun hosi loron 01 outubru -28 Novembru 2015 iha Oe-Cusse.

Reuniaun alargadu inter-orgánika ámbitu MECAAEJ kada fulan ne’e prezide hosi S.E. Ministro do Estado, Coordenador dos assuntos da Administração do Estado e da Justiça (MECAAEJ) Dionísio Babo Soares, P.hD., ne’ebé akompañadu hosi Ministru Justisa Ivo Valente no Sekretáriu Estadu Administrasaun Estatal no Dirijente Sekretariadu Fortalesimentu Institusionál.

Hafoin Ministro do Estado, Dionísio Babo Soares, PhD. intoduz ajenda, fó tempu dahuluk ba Ministériu Justisa hodi aprezenta proposta final PAA Tinan Sivíl 2016 no dezempeñu ezekusaun programa no orsamentu tinan 2015. Diretór-Jerál Ministériu Justisa, Henrique de Oliveira Ximenes mak halo aprezentasaun, inklui entrega mós proposta final PAA 2016 nian hodi lori ba Konsellu Ministru ho pakóte dokumentu justifikasaun PAA nian. Diretór-Jerál ne’e informa katak, ezekusaun Ministériu Justisa atinzi ona 73% engloba ezekusaun real no komprimisu sira, katak iha fulan-rua ba oin ezekusaun iha nivel seguru no optimistiku, signifika sei ezekuta hotu tuir planu.

Ministro do Estado, iha ninia intervensaun ba relatóriu ne’ebé hato’o hosi Ministériu Justisa hateten, “ha’u husu ba Ministériu Justisa atu kontinua servisu maka’as liután, halo lalais ezekusaun para nune’e atinzi saída mak planeia tiha ona, tanba ezekusaun ikus no pagamentu sira-hotu sei hakotu iha loron 15 fulan-Novembru.”

Relatóriu proposta PAA 2016 no ezekusaun programa no orsamentu kontinua ho aprezentasaun Inpesaun-Jerál Estadu, Francisco de Carvalho, depois kontinua ho Sekretária Fortelasimentu Estadu (SEFI) ne’ebé aprezenta hosi Direjente SEFI, Francisco da Costa Soares. Nune’e mós aprezentasaun ikus mak, Ministériu Administrasaun Estatal nian ne’ebé hato’o hosi Diretór Nasionál Administrasaun no Finansas.

Ajenda tuir mai, Minstro do Estado Dionísio Babo Soares kontinua ho aprezentasaun ba guia de estilos karta ofisiál ne’ebé halo hosi Institutu Nasionál Administrasaun Públika (INAP) katak, guia de estilos karta ofisiál nu’udar formatu atu uniforma hotu karta korespondénsia ne’ebé halo hosi instituisaun Governu nian, dezeña unika karta, utilizasaun no pozisaun logo nian, kór, tipu nota intendimentu, notas, etc.

Minstro do Estado, deside atu hari’i ekipa tékniku kiik ida ne’ebé kompostu hosi Ministériu Justisa, SEFI, MAE, Inspesaun Jerál Estadu no INAP. INAP mak sei lidera ekipa ne’e, no husu ba ekipa ne’e atu konsulta no harmoniza tipu karta ne’ebé mak halo ona hosi Sekretáriadu Konsellu Ministru, depois-de finaliza, sei halo workshop ne’ebé sei bolu diresaun jerál ministériu sira-hotu.

“Ita sei halo workshop alargada, sei involve Diretór-Jerál ministeriu hotu-hotu, atu nune’e uniformaliza tiha guia de estilos karta ofisiál antes lori ba Konsellu Ministru hodi legaliza no lori ba implementasaun,” hateten Minstro do Estado Dionísio Babo Soares.

Relasaun ho planu reforma administrasaun públika, planu ne’e aprezenta hosi tékniku Ministériu Administrasaun Estatal. Depois-de aprezentasaun, Ministro do Estado loke diskusaun, rona hanoin lubun kona-ba organizasaun INAP nian no oinsá atu fortifika, planu hari’i Komisaun Reforma Administrativu, se-se mak sei involve, kestaun organizasaun, jestaun ba rekursu umanus no mós ajustamentu sistema ho kuadru legál sira.

Iha ajenda ikus, Komisaun Organizadora Nasionál ba Preparasaun Komemorasaun 500 Anos Enkontru Sivilizasaun halo aprezentasaun prosesu preparasaun no planu implementasaun. Katak, atividade ba serimónia aliénde sentraliza iha Oe-Cusse, sei halo mós iha Dili no Munisípiu hotu-hotu. Komisaun Organizadora aprezenta mós preparasaun ne’ebé halo iha Dili no iha Rejiaun Administrativu Enklave Oe-Cusse.

Regiaun Administrativu Espesiál Oe-Cusse mak fatin eskoiladu hodi komemora 500 anos nian. Nune’e, Komisaun Organizadora aprezenta detailhamente prosesu preparasaun mak la’o dadaun, sá atividade mak sei hala’o, preparasaun fatin serimónia, prezensa paíz amigu sira, rejistu no mobilizasaun partisipante sira hosi Dili, lojistíku, akomodasaun, koordenasaun liña-ministerial no alokasaun orsamentu.

Reuniaun ne’e partisipa hosi Diretór-Jerál sira hosi Ministériu Justisa no Ministériu Administrasaun Estatal, Inspetór-Jerál Estadu, Institutu Nasionál Administrasaun Públika (INAP), Diretór Nasionál sira, Assessór Nasionál no Internasionál.

Maria de Lourdes Lin
Media Officer
Gabinete Ministru Justisa