DILI, CFJ – Sesta-Feira, loron 09 fulan-Otubru 2015, S.E. Ministru Justisa Ivo Valente ofisialmente atribui nasionalidade timorense ba sidadaun estranjeiru hamutuk ema 66 iha Aula Centro Formação Jurídica, Dili.

Atribuisaun nasionalidade ne’e ho serimónia ofisiál entrega sertifikadu nasionalidade timorense nian, sidadaun estrajeiru hamutuk nain 60 mak kaben ho timor-oan, no mós ema nain 6 ne’ebé simu naturalizasaun.

Iha serimónia ofisiál entrega sertifikadu nasionalidade timorense ne’e, Ministru Justisa Ivo Valente iha ninia diskursu hateten,
“Ha’u hakarak hato’o hau-nia bem-vindu no hakuak ba ita-bót sira-hotu ne’ebé mak sai ona timor-oan tanba hakarak husik ita-bót sira nia nasaun hodi moris hamutuk familia bót timor-oan, mai hamutuk kontribui ba ita-nia nasaun ida ne’e hodi hetan prosperiedade. Ita-bót sira liu ona prosesu oioin, tuir duni rekijitu ne’ebé ita-nia Estadu atribui, ita-bót sira hatene no koalia lingua ofisiál, hatene Timor nia kultura no mós hatene história heróika Timor nian, ne’ebé laós fásil atu sai timor-oan.”

Entrega Sertifikadu Nasionalidade tuir duni termu lei, serimónia ne’e laós baibain maske ho serimónia ofisiál simplez de’it, maské nune’e hatudu publikamente Ministériu Justisa ninia kontentamentu hodi simu ita-bót sira, ita-bot sira agora nu’udar irmãs no irmãos, ita-bót sira sai ona sidadaun foun ba Repúblika Demokrátika Timor-Leste, tenik Ministru Justisa.

Ministru Justisa fó-nia mensajem ba sidadaun foun sira katak, sá observánsia dever espesifíku mak sidadaun Timor nian tenke halo, hanesan sidadaun Timor, ita-bót sira sei foti parte importante ba ita-nia Estadu Timor-Leste, ita-bót sira tenke liman nakloke hodi esforsu maka’as, prontu kuandu Estadu presiza no mós partisipa ativu iha ita-nia dezenvolvimentu nasionál, absolutamente ne’e mak dever espesifíku fundamentál liu. Dala ida tán, bem-vindu ba imi-hotu.

Iha biban ne’e, Diretora Nasionál Diresaun Nasionál Rejistu Notariadu (DNRN), Maria Fatima de Araújo hato’o ninia relatóriu katak, sidadaun estranjeiru sira ne’e priense tiha ona rekejitu ne’ebé lei haruka, nune’e mós wainhira sira atu hetan nasionalidade timorense tuir ona Despacho Konjunta entre Ministru Justisa no Ministru Edukasaun ne’ebé mak nomeia Grupo Avaliasaun hodi prova koñesimentu ne’ebé prevista iha Diploma no. 03/2004 efeitu ba atribuisaun nasionalidade timorense.

Sidadaun estranjeiru sira ne’e tuir hotu ijame, sidadaun estranjeiru kazamentu no naturalizasaun tuir prova eskrita no orál, balun liu ijame (aprovadu) no balun tán la-liu ijame ne’e. Tuir lei, sira tenke hatene ita-nia Lian Ofisiál (Portuges ka Tetum), tenke hatene Timor-nia história no hatene Timor-nia kultura, prosesu hirak ne’e sira-hotu priense tiha ona; informa Diretora Maria Fatima de Araújo.

Ijame ba nasionalidade ne’e halo iha Munisípiu-ualu (8) mak hanesan; Bobonaro, Baucau, Dili, Ermera, Liquisa, Manufahi, Viqueque no REA Enklave Oe-Cusse.
Hamutuk nasaun-nen (6) mak sai sidadaun timorense mak hanesan; Austrália, Indonésia, Vietnã, Bélgica, Sri Lanka, Quênia no Portugal.

Partisipa iha semónia atribuisaun nasionalidade timorense, sidadaun foun no nia-familia sira, Sekretáriu Estadu Terras Propriedade, Diretór Jerál-Ministériu Justisa, Inspetór-Jerál, Diretór Nasionál PSIK, Diretóra CFJ, Xéfi Gabinete Ministru Justisa, Xefi Gabinete STP no Diretór Konservadória munisípiu sira.

Maria de Lourdes Lin
Media Officer
Gabinete Ministru Justisa