DILI, PALÁSIU GOVERNU – Sesta-Feira, loron 09 fulan-Outubro 2015, S.E. Ministru Justisa Ivo Valente partisipa iha primeira reuniaun magnifíka iha Palásiu Governu, Dili.

Reuniaun ne’e inisia hosi S.E. Ministru Estadu, Koordenadór Asuntu Ekonómiku (MECAE) Eng. Estanislau Aleixo da Silva no S.E. Ministru Estadu, Koordenádór Asuntu Administrasaun Estadu no Justisa (MECAAEJ) Dionísio Babo Soares, P.hD. ho objetivu atu hetan hanoin no idea sira kona-ba elaborasaun Lei Arbitrajem, revé Kódigu Rejistu Komersiál no mós posibilidade elaborasaun Lei ba Institutu públiku sira.

Diskusaun kuaze oras-rua nia laran ne’e la’o ho di’ak tebes, Ministru Estadu, Koordenadór Asuntu Ekonómiku fó apresiasaun barak kona-ba kestaun Lei Rejistu Komersiál nian, propoin atu revé, nune’e mós husu atu elabora lalais Lei Arbitrajem no Lei Institutu Públika hodi garantia atividade ekonómika no investimentu iha Timor-Leste.

Kuadru legál sira ba investimentu importante tebes, aliénde atu hari’i klima saudável ba investimentu mai iha ita-nia rai, fó mos garantia ba iha rezolusaun problema ruma, katak lei sira ne’e sei hádalan konfiansa investidór sira, dalan ba solusaun no garantia kuandu iha konflitu ruma ba investimentu sira iha futuru.

Reuniaun magnífika ne’e deside atu hari’i Grupo Traballu ida ba elaborasaun lei sira ne’e. Grupo Traballu sei hari’i ho Despacho Konjunta entre Ministru Justisa ho Ministru Estadu, Koordenadór Asuntu Ekonómiku no Ministru Estadu, Koordenádór Asuntu Administrasaun Estadu no Justisa.

Maria de Lourdes Lin
Media Officer
Gabinete Ministru Justisa