DILI, MPIE – Tersa-Feira, loron 13 fulan-Otubru 2015, S.E. Ministru Justisa Ivo Valente tuir reuniaun Konsellu Administrasaun Fundu Dezenvolvimentu Kapitál Umanu (FDKU) iha Aula Reuniaun Ministériu Planeamentu no Investimentu Estratéjiku (MPIE), Fatuhada, Dili.

Reuniaun Konsellu Administrasaun FDKU ne’e prezide hosi S.E. Kay Rala Xanana Gusmão, Presidente Konsellu Administrasaun FDKU, hanesan mós Ministru Planeamentu no Investimentu Estratéjiku.

Hafoin Presidente Konsellu le’e ajenda reuniaun, fó tempu ba Sekretáriu Ezekutivu FDKU, Ismenio Martins da Silva hodi le’e Áta Désimu Segundu Reuniaun ba Membru Konsellu Administrasaun FKDU antes aprova.

Iha áta ne’e eskreve kona-ba guião bolsu estudu nian, transferénsia fundu inter-ministeriál tanba labele ezekuta, vaga ba formasaun adovogadu no prokuradór sira, tipu formasaun, importansia formasaun vokasionál ba jovens sira no seluk-seluk tán. Aliénde halo diskusaun ba kestaun hirak ne’e, Sekretáriu Ezekutivu mós aprezenta desizaun sira ne’ebé mak konsege hakótu iha reuniaun liubá.

Kay Rala Xanana Gusmão iha ninia intervensaun relasiona ho kestaun edukasaun nian hateten, Ministériu Edukasaun, ha’u husu atu Vise-Ministra Edukasaun hare’e ita-nia sistema edukasaun, iha tinan oin mai, 2016, ita tenke foku barak iha área formasaun vokasionál nian, hare’e ba eskola vokasionál Fatumaka no Fuiloro, ita presiza atu dezenvolve badaen barak, servisu téknika nian.

Remata tiha apresiasaun ba iha Áta Reuniaun no aprova, Presidente Konsellu Administrasaun Xanana Gusmão fó tempu ba ekipa tékniku sira iha Sekretáriadu Ezekutivu FKDU Ministériu Planeamentu no Investimentu Estratéjiku hodi halo aprezentasaun kona-ba lala’ok no sistema pagamentu FKDU nian, aprezenta mós relatóriu no dezempeñu ezekusaun FKDU, planu aprovizionamentu nian no aprezentasaun planu ba estudu avaliasaun FKDU.

Relasaun ho aprezentasaun orsamentu ba Fundu Dezenvolvimentu Kapitál Umanu kada ministériu nian hatudu katak, taxa ezekusaun fundu ne’e atinzi ona miliaun $23,909.9 dólar, reprezenta 58% hosi total orsamentu hamutuk miliaun $41,084.0 dólar.

Tuir mai, diskute mós kestaun kustu vida ba bolseiru sira, liu-liu bolseiru ho formasaun kurtu prazu nian katak, presiza iha diferénsia entre kustu ba bolseiru ho viajem servisu nian, presiza iha tabela kustu vida ba bolseiru ho tempu badak wainhira bolseiru ba tuir formasaun iha estranjeiru.

Relasaun ho kestaun ne’e, Ministru Planeamentu no Investimentu Estratéjiku, Kay Rala Xanana Gusmão hateten, Sekretáriu Ezekutivu FDKU tenke konsulta lai ho Ministra Finansas antes fó kbiit mai ha’u, hanesan Presidente Konsellu Administrasaun hodi aprova.

Partisipa mós iha reuniaun ne’e mak, Ministra Finansas Santina Cardoso, Ministru Petróleo no Rekursu Naturais Alfredo Pires, Vise-Ministra Edukasaun Dulce de Jesus Soares, Sekretáriu Ezekutivu FDKU Ismenio Martins da Silva, Diretora Centro Formação Jurídica (CFJ) Marcelina Tilman da Silva, Diretór Nasionál sira hosi SEPFOPE no mós funsionáriu Sekretáriadu Ezekutivu Fundu Dezenvolvimentu Kapitál Umanu.

Maria de Lourdes Lin
Media Officer
Gabinete Ministru Justisa