DILI, MJ — Kuarta-Feira, Loron 14 fulan-Otubru 2015, S.E. Ministru Justisa Ivo Valente halo reuniaun ho tékniku lejislasaun Ministériu Justisa nian iha Gabinete Ministru Justisa.

Iha reuniaun ne’e, Ministru Justisa atu rona progresu elaborasaun lei sira ne’ebé mak prepara dadaun hosi Diresaun Nasionál Assessoria Jurídika no Lejislasaun (DNAJL) no Diresaun Nasionál Rejistu Notariadu (DNRN), nune’e mós fó orientasaun ba ekipa tékniku sira-nia servisu.

Ekipa tékniku hosi DNRN aprezenta hela revizaun finál ba Kódigu Rejistu Sivíl no Rejistu Prediál kona-ba situasaun jurídiku bens e moves nian, katak, revizaun lei hirak ne’e presiza harmoniza ho lei seluk ne’ebé eziste dadaun hodi nune’e iha ninia implementasaun labele hamosu konfuzaun.

Ministru Justisa, Ivo Valente hateten, ha’u husu ba imi atu aprezenta lai proposta ida, depoiz internalmente ita sei diskute didi’ak lai no halo harmonizasaun ho lei sira seluk, ha’u hein proposta finál ba diskusaun internál nian.

Iha biban ne’e mós, DNRN husu ba Ministru Justisa atu dadus rejistu komersiál ne’ebé iha dadaun iha DNRN transfere de’it ba iha SERVE.

Relasaun ho kestaun transferénsia dadus rejistu komersiál ne’e, Ministru Justisa hato’o ninia aseitasaun (le’e: konkorda), tanba sei háfasil no hábadak liután tratamentu ba atividade komersiál nian ho sistema SERVE ne’ebé Governu estabelese ona.

Iha fatin hanesan, tékniku sira hosi DNAJL aprezenta elaborasaun lei kona-ba Rejime Espesiál ba Tradutór Jurídiku, alterasaun ba Estatutu Defensoria Públiku Jerál, mós alterasaun ba Estatutu Orgánika Centro Formação Jurídica (CFJ) no Rejime Renumeratóriu Formadór sira.

Iha apresiasaun no diskusaun lubun ba kestaun hirak ne’e, tékniku sira fó sira-nia hanoin, kestaun jurídiku no mós ninia implikasaun iha implementasaun.

Ministru Justisa husu tékniku DNAJL lori proposta alterasaun, no diskute didi’ak internalmente, proposta finál sei lori ba iha Konsellu Ministru hodi aprezenta no aprova.

Hodi hákotu reuniaun ho tékniku sira, Ministru Justisa fó ninia apresiasaun bót ba servisu maka’as mak hala’o ona hosi tékniku lejislasaun sira, ha’u fó hau-nia orgullu no apresia tanba ita-bót sira ajuda tebes Ministériu Justisa, DNAJL halo esforsu barak ona, maibé ha’u husu ba imi nafatin atu hare’e didi’ak substansia lei hirak ne’e, harmoniza ho lei sira seluk, atu nune’e lei sira ne’e benefisia ba nesesidade ita-nia Estadu.

Partisipa iha reuniaun ne’e, tékniku lejislasaun Ministériu Justisa nian hosi ne’ebé mai hosi Diresaun Nasionál Assessoria Jurídika no Lejislasaun (DNAJL) no Diresaun Nasionál Rejistu Notariadu (DNRN) no Gabinete Ministru Justisa nian.

Maria de Lourdes Lin
Media Officer
Gabinete Ministru Justisa