DILI, CFJ – Sesta-Feira, loron 16 fulan-Otubru 2015, S.E. Ministru Justisa Ivo Valente halo abertura ba formasaun komplementár ba advogadu privada sira durante loron-lima iha Centro Formação Jurídika (CFJ), Caicoli, Dili.

Ministru Justisa, Ivo Valente iha ninia diskursu abertura hateten, formasaun komplementár ba advogadu privada hanesan polítika VI Governu Konstitusionál atu hakbiit nafatin jurista Timor-oan sira no nafatin eleva kapasidade no koñesimentu advogadu privada sira liu hosi formasaun beibeik, tantu iha rai liur no mós halo iha rai laran, objetivu prinsipál ikus mak halo timorizasaun ba iha setór justisa nian.

Tanba-ne’e, ha’u husu ita-bót sira atu aproveita ho di’ak peritu sira ne’ebé mak ita konvida mai iha ne’e, ita sei presiza atu manan esperiénsia barak liután. Ho formasaun ne’e, Governu buka atrai ita-bót sira nune’e iha futuru bele sai mós formadór iha Centro Formação Jurídica, posivél bele sai juíz iha Tribunál ka peskizadór iha área justisa nian, hateten Ministru Justisa.

Ministru Justisa koalia liután, ha’u hakarak espressa ha’u-nia orgullu ba jurísta Timor-oan sira ne’ebé mak ho inisiativu oioin atu hákbiit koñesimentu nafatin. Ha’u hatene ema balun duvida ho timor-oan nia kapasidade, maibé ha’u fiar ita-bót sira, ita estuda nafatin no la-baruk atu hasa’e beibeik ita-nia kapasidade, polítika Governu kona-ba timorizasaun setór justisa sei sai realidade iha tempu oin mai.

Iha oportunidade ida ne’e, ha’u hakarak informa ba ita-bót sira katak, iha área rurais presiza mós prezensa advogadu sira, ita labele hotu-hotu konsentra de’it iha Dili, ita-bót sira presiza mós to’o iha munisípiu sira, iha área rurais ne’ebá ita-nia povu presiza ita; iha Viqueque, Ainaro, Manufahi, etc. Tanba ha’u sempre simu informasaun, ita-nia povu dalabarak defisil hetan advogadu wainhira sira presiza, maske ha’u hatene tebes ita-bót sira balun durante ne’e fó ona asistensia gratuitu ba kliente kbiit laek sira, maibé ita tenke foti prezensa iha povu nia le’et; háhusuk Ministru Justisa.

Hodi hakotu ninia diskursu, Ministru Justisa apresia no agradese ba Presidente Konsellu Jestaun no Disiplina Advokasia no Diretora Centro Formação Jurídica ne’ebé mak halo servisu maka’as hodi konvida peritus internasionál sira, hodi nune’e bele realiza formasaun komplementár ba advogadu privada sira.

Iha fatin hanesan, Presidente Konsellu Jestaun no Disiplina Advokasia (KJDA), Nelinho Vital hateten katak, hanesan umanu iha limitasaun oioin, tanba-ne’e, presiza hákbiit ita-nia matenek no koñesimentu, dalan mak liu hosi formasaun.

Ha’u hatene, formasaun ne’e tempu badak tebes, loron-lima de’it, maibé wainhira ho laran hakarak aproveita ho di’ak, ha’u fiar ita-hotu sei bele aprende buat barak hosi formasaun ida ne’e, aumenta Nelinho Vital.

Presidente KJDA ne’e mós informa, formasaun komplementár ba Advogadu Privada hamutuk ema nain 74, formasaun ne’e mós bele realiza tanba iha servisu di’ak hamutuk entre Konsellu Jestaun no Disiplina Advokasia no Centro Formação Jurídica (CFJ).

Formadór sira ba formasaun komplementár ba advogadu privada iha loron-lima nia laran sei fó hosi Juíz Desembargadór, Alexandre Coelho hosi Portugal no Jean-Pierre peritus internasionál hosi França.

Akompaña Ministru Justisa iha abertura formasaun komplementár ne’e mak Dr. Nelinho Vital, Presidente Konsellu Jestaun no Disiplina Advokasia, no Dra. Marcelina Tilman da Silva, Diretora Centro Formação Jurídica.