DILI, GMJ – Sesta-Feira, loron 16 fulan-Outubru 2015, S.E. Ministru Justisa Ivo Valente simu vizita kortezia hosi General Manager foun Banco Mandiri Timor-Leste, Sr. Lourentius Aris Budiyanto iha Gabinete Ministru Justisa (GMJ), Dili.

Vizita kortezia ne’e hodi aprezenta án no koñese malu hanesan lider instituisaun rua ne’e nian, Banco Mandiri ho Ministériu Justisa, fahe mós informasaun ba malun kona-ba kestaun bankária nian ne’ebé sempre liga ho kestaun jurídiku.

Foufoun Ministru Justisa, Ivo Valente hato’o bem-vindu no obrigadu ba vizita amizavél General Manager foun Banco Mandiri nian hodi hakat mai iha Ministériu Justisa.

“Ha’u hakarak hato’o hau-nia bem-vindu ba Sr. Aris (Lourentius Aris Budiyanto) nu’udar General Manager foun Banco Mandiri, Governu Timor-Leste sempre posivél nakloke ba komunikasaun ho setór bankária nian, atu asegura ninia funsionamentu la’o di’ak hodi estimula dezenvolvimentu ekonómia Timor-Leste,” hateten Ministru Justisa.

Sr. Lourentius Aris Budiyanto hateten, ha’u kontente bele hasoru malu ho Señor Ministru Justisa, ha’u mai atu fó koñese án hanesan General Manager foun Banco Mandiri iha Timor-Leste, no afirma ami-nia komitmentu ba dezenvolvimentu ekonómia iha paíz ida ne’e.

Vizita hatudu amizavél tebes, fahe informasaun kona-ba operasaun Banco Mandiri iha Timor-Leste kuaze tinan 11 ona, dezafiu sira ne’ebé banco hasoru dadaun, no espressaun banco nian ba iha dezenvolvimentu Timor-Leste nian.

Ministru Justisa espressa katak, Banco Mandiri durante ne’e ajuda ona Timor-Leste, Governu Timor-Leste sei esforsu nafatin hodi hatu’ur lei propiu nune’e fó klima pozitiva ba investimentu bankária nian, por ezemplu, kestaun Estatuta Rai (Lei Rai) no sertifikasaun ba propriedade privadu nian, kestaun sira ne’e importante ba garantia banco sira atu fó imprestímu ba kliente sira.

Ha’u submete ona Lei Rai ba iha ami-nia Parlamentu Nasionál, hein diskusaun iha plenaria no aprova, ami mós sei esforsu dadaun halo Rejime Rejistu Prediál no Rejime Rejistu Automoveis, ha’u hanoin, lei hirak ne’e sei hádalan mós ba garantia bankária nian kuandu lei sira ne’e aprova ona, ne’e katak, klima investimentu iha paíz foun ne’e saudável tebes.

Vizita kortezia durante minutu 35 iha lokoraik, hákotu ho foto hamutuk nu’udar dokumentasaun ba Gabinete Ministru Justisa.