Ministériu Justisa (MJ) liu hosi Diresaun Nasionál Direitus Umanus no Sidadania (DNDHC) hala’o programa divulgasaun iha Postu Administrativu Natarbora, loron 14 Outobru 2015 no iha suco Sananain Postu Administrativu Laklubar, loron 15 Outobru 2015.

Hosi ekipa nasional ba divulgasaun ne’ebé kompostu hosi diresaun hanesan DNDHC no Diresaun Nasional Rezistu no Notariadu (DNRN) hodi divulga lei mak hanesan: Politika Governu konaba sistema Lei no Atribusaun Titularidades beins e movies, Registu Civil, Lei nasionalidade, Lei Protesaun Testamunha, Lei kona-ba direitu familia no direitu sussesoes inklui Violensia Domestika.

Diretór Nasionál DNDHC, Celito Cardoso legal li-liu oinsa atu minimize konflitu horizontal ne’ebe mosu iha komunidade, ho divulgasaun iha kada sesaun abertura hateten, objetivu prinsipal ba programa ne’e hodi transmite informasaun ida ne’e oinsa sidadaun sira bele hatene sira nia direitu no dever sivika nudar sidadaun hodi hametin justisa no paz iha estadu direitu demokatiku ida ne’e.

Momentu iha Postu Administrativu Natarbora Reprezentante Administrador iha nia intervensaun katak “ Hau agradese ba ekipa Ministériu Justisa tanba bele mai hodi fahe informasaun ba autoridade lokál no komunidade sira, buat todan iha ne’e bai-bain hamosu konflitu maka kona-ba rai nian, tan ne’e hau husu komunidade sira tau atensaun no komprende didiak para ita labele sai vitima iha loron ikus.”

Iha fatin no loron ne’ebé lahanesan, iha Suco Sananain, Postu Administrativu Laklubar, Administrador Postu Laklubar, Rui Soares hateten, “Oportunidade ida ne’e importante atu haforsa ita nia kuinesimentu kona-ba direitu no dever relasaun ho lei refere, ita presija halo barak mak dever para kontribui ba dezenvolvimentu estadu, labele hatene demokrasia no lahatene hirarkia no servi estadu, lia ikus hau sujere se ekipa ne’e mai fali disemina informasaun bele ba ami nia suco ida naran Suco Fatumakerek”.

Kontiudu informasaun ne’ebé lansa iha kada sesaun divulgasaun hanesan tuir mai; Politika Governu kona-ba Rai, hato’o hosi Diretór DNDHC, Celito Cardoso, Rezistu Sivil no Rezistu Kazamentu hato’o hosi Diretora DNRN, Maria Fatima, Direitu Familia no Susesaun hato’o hosi Xefe Departementu Direitus Umanus, Francisco X.V Soares, Lei Protesaun Testemuña hato’o hosi Xefi Departementu Divulgasaun, Jose Paulino, Lei Kontra Violensia Domestika hato’o hosi Tekniku Superior, Carmelindo da Silva Caetano.

Prekupasaun no duvida hosi komunidade iha area rua refere barak liu maka husu pergunta sira relasiona ho problema rai nian, segundu kona-ba rezistu sivil, area rua neé rekomenda hodi bele asesu Bilete Identidade iha sira nia teritoriu.

Formasaun ne’e partisipa hosi autoridade lokál sira mak hanesan; Administrador kada Postu ne’ebé refere Xéfi Suku no Aldeia, Lider Tradisionál, Professores sira, Lider Grupo Feto sira, Juventudi sira inklui Estudante estaziadu sira hosi UNTL.