DILI, GMJ – Segunda-Feira, loron 19 fulan-Otubru 2015, S.E. Ministru Justisa Ivo Valente halo reuniaun ho peritu laboratórium ba Polísia Sientífika Investigasaun Kriminál (PSIK) iha Gabinete Ministru Justisa, Dili.

Peritu hamutuk nain-rua mai iha Ministériu Justisa hodi aprezenta án ba Ministru Justisa, peritu sira ne’e mai hosi Polísia Judisiáriu Portugal. Aliénde aprezenta án, sira koalia mós apoiu tékniku ba instalasaun laboratórium PSIK nian, nune’e mós sei fó formasaun ba espesialidade laboratórium nian ba Polísia Sientífika Investigasaun Kriminál.

Ministru Justisa iha lian makloke hato’o ninia bem-vindu ba peritu nain-rua ne’ebé mai hosi Polísia Judisiáriu Portugal, nia agradese mós kooperasaun di’ak ne’e, katak, ho prezensa peritu ne’e sei ajuda Timor-Leste no kompleta fasilidade balun ba servisu PSIK nian iha área laboratórium nian.

Peritu nain-rua ne’e informa katak, sira sei instala laboratórium ho tipu rua, laboratórium fixu ne’ebé Ministériu Justisa mak sei oferese aula ka espasu propiu hodi halo instalasaun, no ida seluk mak laboratórium movél ne’ebé sei instala ba iha kareta-rua ne’ebé PSIK iha dadaun.

Iha sorin seluk, Ministru Justisa koalia mós planu Ministériu Justisa nian relasaun ho planu konstrusaun edifísiu foun ba PSIK nian. Hanesan instituisaun foun, PSIK seidauk iha edifísiu propiu ida, temporariamente, PSIK sei uza espasu Edifísiu Ministériu Justisa nian, no hein edifísiu foun.

Peritu nain-rua ba PSIK ne’e hanesan apoiu kooperasaun Governu ho Komisaun Europeia liu hosi Instituto Camões.

Akompaña Ministru Justisa iha reuniaun Xéfi Gabinete Ministru Justisa, Dr. Evangelino Belo.