DILI, GMJ – Segunda-Feira, loron 26 fulan-Otubru 2015, S.E. Ministru Justisa Ivo Valente hala’o reuniaun ho Emabaixadór Extraordináriu no Plenipotensiáriu Repúblika Federativa Brazil iha Dili, Timor-Leste, Señor José Amir da Costa Dornelles iha Gabinete Ministru Justisa (GMJ), Dili.

Ministru Justisa, Ivo Valente hateten, reuniaun ida ne’e nu’udar inisiativa Ministru Justisa nian, hanesan mós Presidente Konferénsia Ministru Justisa sira CPLP nian, atu esforsu nafatin atu dezenvolve relasaun kooperasaun iha domíniu justisa nian ho Repúblika Federativa Brazil iha Timor-Leste. Aliénde diskute kooperasaun temátiku balun, reuniaun ne’e mós atu asegura nafatin lasu amizade forte entre Governu Timor-Leste ho Governu Brazil liu hosi ninia reprezentasaun iha Dili, Timor-Leste.

Diskusaun inisiu ho ajenda kona-ba delegasaun hosi Defensoria Pública da União (DPU) Brazil ne’ebé mak sei mai iha Timor-Leste hodi fó asisténsia tékniku jurídiku ba Defensoria Públiku Jerál Timor-Leste. Tanba-ne’e, reuniaun ne’e deside katak, Brazil sei haruka ninia ema DPU, ema nain-ida mak sei mai iha Timor-Leste iha tinan rohan 2015 ida ne’e, nune’e mós DPU Brazil sei haruka tán ema nain-rua iha inisiu tinan 2016.

Defensór Públiku Jeral, Dr. Sergio Hornai hateten, importante atu konkretiza asaun kooperasaun ho Brazil bazeiadu reuniaun iha Marsu 2015 liubá, relasiona ho delegasaun Defensoria Públika da União mai iha Timor-Leste atu fó apoiu ba Defensoria Públiku Jerál Timor-Leste.

Diskusaun tuir mai kona-ba XV Conferência dos Ministros da CPLP iha Brazil ho tema Propriedade da Terra e Desenvolvimento, konferénsia ne’e sei hala’o iha primeiru semestre 2016, tinan oin. Eventu ida ne’e sei koordena hosi Ministériu Justisa Brazil ho MDA, INCRA no Ministériu Relasaun Exteriór. Posibilidade ba preparasaun konferénsia ida ne’e sei iha reuniaun segundu ba grupu traballu ne’ebé mak sei akontese iha fulan Dezembru 2015.

Ministru Justisa hateten, kestaun interese Governu Timor-Leste nian mak sei poderia ajenda bilateral balun, nune’e mós sei buka koñese Sistema Nasionál Kadastru, Terras no Lejislasaun Brazileira nian.

Iha reuniaun ne’e koalia mós kona-ba Reunião das Instituições Públicas de Assistência Jurídica (RIPAJ) ba Paíz sira Lingua Portuguesa nian; reuniaun ikus hala’o ona iha loron 22-23 fulan-Setembru 2015 iha Sidade da Praia Cabo Verde, no deside atu reuniaun RIPAJ tuir mai iha Timor-Leste, maibé ho razaun balun, RIPAJ sei halo iha proxima ano (2016) iha Brazil.

Partisipa iha reuniaun ne’e mak Señor Defensór Públiku-Jerál, Dr. Sergio Hornai no mós Assessór Jurídiku Ministru Justisa, Dr. João Pedro Campos.