DILI-Sekretáriu Estadu Terras Propriedades (SETP) Jaime Xavier Lopes iha loron 26 fulan-Outobru 2015 foin lalas ne’e hala’o abertura ba treinamentu kona-ba hasa’e kapasidade funsionáriu DNTPSC-DCIA hodi bele sai servedór ne’ebé di’ak no iha kualidade.

Iha treinamentu ne’ebé sei hala’o durante semana ida ne’e SETP liuhosi ninia abertura hateten, Trinamentu ne’e importante tebes ba iha tékniku sira hodi bele hatene, hodi bele hala’o sira nia knar iha komunidade sira nia leet ho diak no iha kulidade.

Eis diretór Nasional Terras Propriedade nian ne’e mós husu ba ba funsionáriu sira atu bele aprende oportunidade ne’ebé maka iha, hodi bele implementa servisu ho di’ak iha future, nune’e mós aproveita di’ak tempu hodi bele sai servedór diak ida ba iha povu ho nasaun nee iha futuru.

Iha abertura ne’ebé hetan mós partisipasaun hosi Diretór Nasional Administrasaun Finansas Ministériu Justisa, Diretór Nasionál Diresaun Nasionál Terras Propriedades e Servisu Cadastrais (DNTPSC) no Diretór Jerál MJ nian ne’e SETP hateten, hanesan tekniku sukat rai nian labele halo problema ho ho ema ne’ebé hakarak sukat sira nia rai, hanesan tanba nia ba atu buka solusaun hodi bele rezolve komunidade saira nia problema.

Jaime hateten, oras ne’e daudaun mosu mudansa oin-oin liliu kona-ba teknolojia, tanba ne’e hanesan funsionáriu presiza aumenta buat-barak, nune’e bainhira iha mudansa funsionariu sira mós labele atraza ho mudansa sira.

Nia mós husu ba partisipante sira ne’ebé maka sei tuir treinamentu ne’e tenki disiplina hodi bele simu matenek ne’ebé maka sei fó hosi Tékniku Sistema Nasionál Castro (SNC) hodi bele aumenta tan kapasidade ne’ebé maka partisipante sira iha ona.

Iha fatin hanesan Diretor Jerál Ministériu Justisa Henrique Ximenes Oliveira husu ba funsionáriu DNTPSC tenki dumina sistema ne’ebé maka iha, nune’e bele haree no prepara kapasitasaun funsionariu sira nian iha futuru.

Iha treinamentu ne’ebé realiza hosi Departementu Cadastro ne’ebé ho nia formadór sira mai hosi tékniku SNC nian ne’e Henrique hateten, nia mós fiar katak treinamentu ne’e sei bele eleva di’ak liutan servisu funsionáriu sira nian.

Treinamentu ne’ebé sei hala’o iha iha Diresaun Nasionál Terras Propriedades no Servisu Kadastrais (DNTPSC) durante loron semana ida ne’ebé sei hahuu iha loron 26-30 fulan Outobru 2015 ne’e organiza hosi Departementu Cadastru Informasaun no Avaliasaun (DCIA) ho nia totál orsamentu 3.600 dollares no tékniku sira ne’ebé tuir trinamentu hamutuk nain 25 ne’ebé inbolve mós funsionariu tékniku sira hosi Munisipiu. *