DILI, PN – Kinta-Feira, loron 29 fulan-Otubru 2015, S.E. Ministru Justisa Ivo Valente hala'o diskusaun informál ho Komisaun A Parlamentu Nasionál (PN), Komisaun ba Asuntu Konstitusionál, Justisa, Administrasaun Públika, Poder Lokál no Anti-Korrupsaun iha Sala Komisaun A Parlamentu Nasionál, Dili.

Objetivu hosi reuniaun ne’e atu fó apresiasaun ba iha alterasaun Lei no. 11/2008, Rejime Jurídiku Advokasia Privada no Formasaun Advogadu sira.

Iha diskusaun informál ne’e, Ministru Justisa fó-nia hanoin balun atu aperfeisua Rejime Advogadu Sira, hato’o mós razões ba alterasaun no ninia implikasaun ba kna’ar advogadu sira wainhira hala’o ninia servisu ba asisténsia públiku, liu-liu ba kliente buka-nain justisa.

“Alterasaun datoluk Lei no. 11/2008 ne’e atu halo ajustamentu Rejime Jurídiku Advokasia ba situasaun ne’ebé advogadu privada sira hasoru dadaun, lei ne’e sei fó biban ezersísiu ba advokasia, advogadu sira sei hetan koñesimentu tuir padraun disiplina advokasia nian, nune’e ita-nia advogadu sira sei manan prátika no esperiénsia ne’ebé oferese hosi Centro Formação Jurídika,” esplika Ministru Justisa.

Iha sorin seluk, Presidente Komisaun A Sra. Carmelita Caetano Moniz informa katak, presiza iha diskusaun profunda kada artigu iha audiénsia ba espesialidade alterasaun Lei no. 11/ 2008, tanba-ne’e, prezensa Sr. Ministru Justisa presiza tebes hanesan ezekutór ba lei ida ne’e, ita bele hetan mós ninia hanoin antes komisaun finaliza no submete ba iha plenária Parlamentu Nasionál hodi hetan apresiasaun ikus no halo aprovasaun.

Hodi remata diskusaun informál ne’e, Sra. Carmelita Caetano Moniz mós informa katak, hamutuk projetu lei hat (4) hosi Ministériu Justisa mak agora dadaun iha Komisaun A hodi diskute no analize, lei hirak ne’e mak; Projetu Lei Advogados Privada, Ordem Advogados, Lei Indultos no Lei Trafíco Humanos.

Partisipa iha diskusaun ne’e mak, Presidente Komisaun A Sra. Carmelita Caetano Moniz, Vise-Presidente Sr. Arão Noé de J.C. Amaral, Deputada Ângela M. C. de Andrade Sarmento no Deputada Aurora Ximenes, Diretora Interina DNAJL no Assessór sira hosi Ministériu Justisa.

Maria de Lourdes Lin
Media Officer
Gabinete Ministru Justisa