DILI, SNC – Tersa-Feira, loron 03 fulan-Novembru 2015, S.E. Ministru Justisa prezide Sétima Reuniaun ho Ekipa Monitorizasaun no Avaliasaun Sistema Nasionál Kadastru (EMA-SNC) iha Sala reuniaun SNC, Balide, Dili.

Sétima reuniaun ne’e hodi rona aprezentasaun relatóriu tékniku no ezekusaun atividade kadastru to’o fulan-Otubru 2015 em termus físika no finansiamentu tuir kronograma kontratu ne’ebé Ministériu Justisa halo entre konsórsiu Grupu Media Nacional Holding (GMN-H) ho ARM-APPRIZE.

Reuniaun EMA-SNC hanesan espasu atu rona aprezentasaun tékniku SNC ba rezultadu servisu SNC no dezafiu sira ne’ebé servisu kadastru hasoru iha kampu. Por ezemplu, tuir relatóriu katak ekipamentu geodésiku ne’ebé instala ona hetán estragus hosi ema balun, limitasaun funsionáriu iha kampu, akontese konflitu rai entre populasaun sira iha fatin barak no kestaun atribuisaun rai komunál nian.

Aliénde aprezenta dezafiu, Diretór Tékniku ARM-APPRIZE, João Loução mós koalia kona-ba rezultadu sosializasaun ne’ebé mak hala’o hosi fulan-Setembru 2014 to’o iha Otubru 2015 kuaze hamutuk dala 330 liu hosi enkontru aproximasaun ho autoridade lokál sira, enkontru ho komunidade sira, serimónia lansamentu SNC no mós enkontru sensiblizasaun ba líder lokál sira.

Ministru Justisa, Ivo Valente hateten, kolaborasaun ho povu importante tebes ba servisu kadastrál, ita-nia povu tenke informadu, tanba-ne’e, presiza iha reuniaun no fahe beibeik informasaun ba ita-nia povu sira no mós ba ita-nia líder lokál sira, dalaruma sira menus informasaun ka informasaun mak ladun klaru bele afeita ba iha Servisu Nasionál Kadastru nian.

Relasaun ho falta rekursu umanus, Ministru Justisa hateten, iha tinan oin mai, 2016, ita sei esforsu hodi halo involvimentu maiz ativu hosi funsionáriu sira ba hamutuk ho ekipa SNC nian, sei monta sira iha munisípiu sira, aliénde atu aprende uzu téknolojia SNC, háfasil no reforsa servisu kadastrál nian iha futuru.

Relatóriu ida ne’e mós esplika kona-ba produsaun área kolesaun rai to’o fim-de Otubru 2015, totál nasionál ba rejistu rai ne’ebé SNC halo ona hamutuk 58.491 parsela. Tuir planu, remata tinan 2015 sei atinzi valór global ne’ebé mak sei rejistradu hamutuk 68.725 parsela.

Ekipa Monitorizasaun no Avaliasaun Sistema Nasionál Kadastru (EMA-SNC) iha sesaun ikus, aprova Ata Deliberasaun ba Sexta Reuniaun (11/09) no forma ekipa ne’ebé kompostu hosi Xéfi Gabinete Ministru Justisa, DNAJL, DNTP no SNC atu halo planu diskusaun ba esbosu alterasaun Diploma Ministérial, hodi fó biban ba lejislasaun apoiu servisu kadastrál nian.

Partisipa iha reuniaun ne’e mak Sekretáriu Estadu Terras no Propriedades (SETP) Eng. Jaime Xavier Lopes; Diretór Nasionál Terras, Propriedades no Servisu Kadastrál Romão Guterres M.Eng.; Xéfi Depatementu Kadastru, Informasaun no Avaliasaun Gabriel Carvalho de Araújo; Xéfi Departementu Atribuisaun Títulu no Disputa Terras Eng. Rodrigo Mendonça; Xéfi Gabinete Ministru Justisa Dr. Evangelino Belo; Assessór Komunikasaun Sosiál Joaozito Viana; Diretór Tékniku ARM-APPRIZE Sr. João Loução ho ninia ekipa.

Maria de Lourdes Lin
Media Officer
Gabinete Ministru Justisa