OE-CUSSE – Kinta-Feira, loron 05 fulan-Novembru 2015, S.E. Ministru Justisa Ivo Valente tuir reuniaun Komisaun Koordenasaun no Akompañamentu ba autoridade Rejiaun Administrativa Espesiál Oe-cusse Ambeno (RAEOA), Zona Espesiál ba Ekonómia Sosiál de Merkadu (ZEESM) iha Oe-Cusse.

Reuniaun ne’e hodi diskute progressu dezenvolvimentu infra-estrutura ne’ebé la’o dadaun iha Rejiaun Administrativa Espesiál Oe-Cusse no mós rona no diskute aprezentasaun relatóriu hosi Komisaun Organizadora ba preparasaun komemorasaun 500 anos enkontru sivilizasaun hosi loron 01 Outubru -28 Novembru 2015 iha munisípiu sira, no serimónia prinsipál iha loron 28 fulan-Novembru 2015 iha Oe-Cusse.

Reuniaun Komisaun Koordenasaun no Akompañamentu RAEOA ne’ebé prezide hosi S.E. Primeiru Ministru Dr. Rui Maria de Araújo, hahu ho rona aprezentasaun hosi Kompañia WIKA relasiona ho konstrusaun Aeroportu Internasionál Oe-Cusse.

Depois-de aprezentasaun, reuniaun hákotu ho desizaun katak, alarga tán pista aviaun nian hodi atinzi 3 Kuilómetru, atu nune’e, aviaun bót mós bele halo aterrajem.

Primeiru-Ministru hateten, dezenvolvimentu ne’ebé la’o iha RAEOA-ZEESM, ema balun hanoin katak investimentu Estadu ne’e só fó de’it benefísiu ba Oecusse, maibé ida ne’e lalos, benefísiu ne’e ba povu tomak.

Iha sorin seluk, diskusaun ne’e mós koalia kona-ba kestaun indimizasaun ba populasaun afeitadu sira.

Relasaun ho kestaun indimizasaun, Ministru Justisa esplika katak, Autoridade RAEOA bele buka mekanismu antes Lei Exproriasaun aprova hosi Parlamentu Nasionál, dalan mak halo rezolusaun ida kona-ba Subsidiu de Apoiu Umanitáriu, laós kompensasaun, no Ministériu Justisa sei fornese apoiu tékniku hodi dezenvolve rezolusaun ida ne’e.

Iha futuru, polítika umanitáriu ne’ebé reflete ba Rezolusaun kona-ba Subsidiu de Apoiu Umanitáriu bele aplika iha munisípiu hotu-hotu, territóriu laran tomak. Iha opsaun lubun ida kuandu Governu hakarak muda ninia populasaun ba interese públiku nian; ita bele troka rai ho rai, uma ho uma, kiós ho kiós, hodi nune’e atu fasilita di’ak liután ita-nia povu wainhira Governu presiza sira-nia fatin; esplika Ministru Justisa, Ivo Valente.

Hafoin diskute kestaun dezenvolvimentu iha RAEOA, Presidente Meja, Primeiru-Ministru fó biban ba iha Komisaun Organizadora ba preparasaun komemorasaun 500 anos enkontru sivilizasaun Portugál ho Timor-Leste; atu aprezenta relatóriu preparasaun atividade sira hosi loron 01 Outubru -28 Novembru 2015 iha munisípiu sira, no serimónia prinsipál iha loron 28 fulan-Novembru 2015 iha Oe-Cusse.

Iha aprezentasaun ne’e, koalia kona-ba tipu atividade sira; hosi atividade kultural, expozisaun, filme, isár bandeira no selu-seluk tán. Aliénde ne’e mós koalia kona-ba preparasaun lojistíka, akomodasaun, simu bainaka nasionál no internasionál.

Partisipa mós iha reuniaun ne’e mak; Presidente Autoridade RAEOA Dr. Mari Alkatiri, Ministru Planeamentu no Investimentu Estratéjiku Sr. Kay Rala Xanana Gusmão; Ministru Estadu, Koordenadór Asuntu Administrasaun Estadu no Justisa nian no Ministru Administrasaun Estatál Dr. Dionísio Babo Soares; Ministru Estadu, Koordenadór Asuntu Sosiál no Ministru Edukasaun Sr. António da Conceição; Ministru Justisa Sr. Ivo Valente, Ministru Turismu, Arte no Kultura Sr. Francisco Kalbuady Lay; Vise-Ministru Finansas Dr. Hélder Lopes, Vise-Ministra Saúde Dra. Ana Isabel Soares, Vise-Ministru Solidariedade Sosiál Sr. Miguel Manetelu, Vise-Ministru Obras Públika, Transporte no Komunikasaun I Sr. Januário da Costa Pereira; Vise-Ministru Obras Públikas, Transporte no Komunikasaun II Eng. Inácio Moreira, Vise-Ministru Komérsiu Indústria Sr. Filipus “Nino” Pereira, no membru autoridade RAEOA nian.

Manuela Soares Sequeira
Mídia Gabinete Ministru Justisa