DILI, PGR – Sabadu, loron 07 fulan-Novembru 2015, S.E. Ministru Justisa Ivo Valente partisipa iha serimónia tomada de posse ba majistradu foun Ministériu Públiku hamutuk na’in 11 iha Edifísiu Prokuradoria Jerál Repúblika (PGR), Kolmera, Dili.

Iha ninia diskursu, Ministru Justisa hateten, hanesan ezekutivu, Governu apresia no orgullu ho esforsu Prokuradór Jerál da Repúblika nian, Dr. José da Costa Ximenes ne’ebé konsege hasa’e númeru Majistradu Ministériu Públiku ho signifikativamente, númeru ne’ebé mak aumenta, ita hakat liután dadaun dezafiu balun ne’ebé setór justisa hasoru.

Hahu 2006, primeiru grupu majistradu liu hosi Centro Formação Jurídica sei ho númeru ki’ik tebes, agora atinzi ona prokuradór hamutuk ema nain 33, inklui nain 11 iha tinan 2015, númeru graduadu bót ba beibeik kompara ho tinan hirak liubá.

Iha ninia sirkumstánsia majistradu Ministériu Públiku, hahu dadaun ultra-passa dezafiu no obstakulu oin-oin, por ezemplu iha tinan 2006, primeiru grupu majistradu ho nia dezafiu rasik, no ohin majistradu sira ho nia dezafiu la-hanesan ona, maibé objetivu sei hanesan de’it mak atu garante sidadaun sira-nia direitu no liberdade, no respeita Estadu nia prinsípiu direitu demokrátiku; hateten Ministru Justisa, Ivo Velente.

Ministru Justisa hatutan, dalabarak ita rona setór justisa sei fraku, ha’u dehan ba ita-bót sira, la’e, setór justisa agora la-fraku ona, em faze la’o dadaun no forte dadaun, kuaze ofisiais justisa mesak Timor-oan, maske ita sei presiza apoiu hosi liur maibé importante mak ita tenke hatudu ba povu katak justisa iha ba sira, justisa iha ba ita-nia povu hotu-hotu.

Hodi hákotu ninia diskursu, Ministru Justisa hato’o ninia orgullu no parabéns ba emposadu sira, nune’e mós ba família bót Ministériu Públiku no família emposadu sira.

“Parabéns ba ita-bót sira, parabéns mós imi-nia família, ha’u hatene ita-bót sira sei sakrifíka ita-bót sira-nia kaben no oan, tanba Estadu presiza tebes ita-bót sira-nia servisu maka’as, maibé imi sei la-mesak ida, ita-bót sira-nia servisu sei sura ho Estadu nia apoiu,” enkoraja Ministru Justisa, Ivo Valente.

Iha sorin seluk, Prokuradór Jerál Repúblika Dr. José da Costa Ximenes iha ninia diskursu hateten, loron ohin, loron importante ba vida profesionál prokuradór foun nain 11 ne’ebé mostra ona orgullu tanba dahuluk Ministériu Públiku simu númeru majistradu barak, signifika ho númeru prokuradór agora ema-ida iha tinan-ida atende kuaze kazu 150 de’it ona, kuantidade nato’on ona atu garante kualidade justisa ne’ebé di’ak no kredibel.

Prokuradór Jerál hateten liután katak, prokuradór foun sira ne’ebé simu dadaun posse liu ona faze tolu ba sira-nia formasaun, sira liu faze formasaun teoría durante tinan-ida iha Centro Formação Jurídica (CFJ) iha fulan-Abril 2013, depoiz kontinua faze prátika fulan-nen iha Prokuradoria Distritál Dili (PDD) no faze ikus mak estájiu durante tinan-ida iha Ministériu Públiku ne’ebé remata iha loron 01 fulan-Novembru 2015.

“Prokuradór sira ne’ebé simu ona posse, imi hamutuk nain 11, ha’u sei koloka balun iha Dili no balun tán sei koloka iha munisípiu sira,
no Ministériu Públiku sei esforsu no hatu’ur kondisoens própriu hodi nune’e ita-bót sira bele hala’o kna’ar ho di’ak hodi hari’i justisa iha ita-nia rai,” promete Prokuradór Jerál Repúblika, Dr. José da Costa Ximenes.

Partisipa iha serimónia tomada de posse ba majistradu foun Ministériu Públiku mak, Juís Administradora Tribunál Rekursu, Adjunta Prokuradór, Komisáriu KAK, Defensór Públiku Jerál, Asosiasaun Advogadu sira, Diretora CFJ, UNDP, membru Konsellu Superior Majistratura, Diretór Interinu PSIK, PNTL Eskuadra Dili, formadór nasionál no internasionál sira, família emposadu, funsionáriu Ministériu Públiku, no konvidadu sira seluk tán.

Maria de Lourdes Lin
Media Officer
Gabinete Ministru Justisa