DILI, MJ – Segunda-Feira, loron 09 fulan-Novembru 2015, Ministru Justisa Ivo Valente prezide Reuniaun Konsellu Jerál Centro Formação Jurídica (KJ-CFJ) iha Sala Reuniaun Ministériu Justisa, Dili.

Reuniaun ne’e diskute ordem traballu kona-ba (1) formasaun komplementár ba majistradu sira, no (2) konkursu públiku no rekrutamentu ba formadór sira ne’ebé mak sei fó apoiu ba iha Centro Formação Jurídika.

Iha nia lian makloke, Ministru Justisa hato’o ninia obrigadu barak ba konseleiru sira hodi foti fatin iha reuniaun Konsellu Jerál do CFJ.

Obrigadu barak ba konseleiru sira-nia prezensa ba reuniaun importante ida ne’e, ha’u hakarak informa ba ita-bót sira katak, objetivu reuniaun ne’e mak ita atu altera desizaun reuniaun anteriór nian (07/08/2015) kona-ba data no tempu ba kursu komplementár no rekrutamentu ba formadór sira; informa Ministru Justisa hanesan mós Presidente Konsellu Jerál do CFJ.

Iha prosesu diskusaun, Presidente Tribunál Rekursu, Prokuradór Jerál, Defensoria Públika Jerál no Diretora CFJ konkorda atu deside uluk data fixu ba formasaun nian, maibé depois-de halo lai konkorsu públiku ba formadór sira antes remata iha fulan-Dezembru 2015.

Diskusaun la’o iha ámbitu mutuá - vice-versa, konseleiru idak-idak hare’e data no ajusta ho sira-nia planu hodi nune’e la-afeita ba iha desizaun ne’ebé sira sei hákotu.

Ikus mai, reuniaun Konsellu Jerál Centro Formação Jurídica hákotu ho desizaun, formasaun komplementár ba majistradu sira sei hahu iha loron 15 fulan-Janeiru 2016. Enkuantu, rekrutamentu ba formadór sira bele hahu ona agora até 15 fulan-Dezembru 2015, hodi nune’e sei fó biban ba iha Konseleiru sira atu halo selesaun no anúnsia ninia rezultadu.

Reuniaun Konsellu Jerál Centro Formação Jurídica ne’e partisipa hosi Konseleiru KJ-CFJ sira mak hanesan; Ministru Justisa Ivo Valente (prezide), Presidente Tribunal Rekursu Dr. Gulhermino da Silva, Procurador-Geral da República Dr. José da Costa Ximenes, Defensor Público Geral Dr. Sergio Hornai, no Directora do CFJ Dra. Marcelina Tilman.

Reuniaun hahu iha tuku 04:00 lokoraik no remata iha tuku 05:10 lokoraik.

Maria de Lourdes Lin
Media Officer
Gabinete Ministru Justisa