DILI, PSIK – Segunda-Feira, loron 16 fulan-Novembru 2015 (tuku 4:00 lokoraik), S.E. Ministru Justisa Ivo Valente entrega ekipamentu laboratóriu ba Polísia Sientífika Investigasaun Kriminál (PSIK) ne’ebé hetan apoiu hosi União Europeia iha Portugal através hosi Instituto Camões ba Programa Justisa iha Sala Konferénsia PSIK, Kaikoli, Dili.

Alénde entrega ekipamentu laboratóriu nian, iha serimónia ne’e, Ministru Justisa entrega mós sertifikadu formasaun ba ajente PSIK hamutuk ema-nain 16 ne’ebé mak hetan ona formasaun espesializada hosi Polísia Judisiária Portugal kona-ba utilizasaun ekipamentu laboratóriu nian.

Iha ninia diskursu, Ministru Justisa Ivo Valente hateten, primeira serimónia ida ne’e, ha’u sei entrega ekipamentu Laboratóriu Polísia Sientífika nian ba Polísia Sientífika Investigasaun Kriminál, ba Diretór- Nasionál PSIK, nune’e, ha’u sei entrega unidade laboratóriu móvel rua ne’ebé instala ona iha kareta-rua no entrega mós laboratóriu fixu ida.

“Laboratóriu Polísia Sientífika ne’e importante ba Estadu Timor-Leste, nune’e sei haforsa PSIK hodi uza ba servisu kontra kriminalidade organizada, kontra brankeamentu kapitál, kontra finansiamentu terorismu, tráfiku humanu, droga, ráptus, fraúde fiskál, no seluk-seluk tán, nune’e mós nu’udar meius temátika ne’ebé Polísia Investigasaun uza atu partilla informasaun ba malun entre órgaun Polísia Kriminál ne’ebé espalha iha mundu tomak,” hateten Ministru Justisa.

Relasaun ho formasaun ne’ebé investigadór PSIK hetan ona, Ministru Justisa hateten liután, agora dadaun ita eleva kapasidade PSIK nian, ho ida ne’e, ha’u hakarak hato’o agradesimentu ba formadór Polísia Judisiáriu Portugal nian liu hosi kooperasaun ho Uniaun Europeia – Instituto Camões ba Programa Justisa iha Timor-Leste, ita iha ona kapasidade hodi kontra fenómenu terorismu ne’ebé hahu forte ba beibeik hodi fó amiasa ba defeza nasaun idak-idak nian.

Hodi hákotu ninia diskursu, Ministru Justisa hateten, iha momentu ne’e, fasilidade ne’ebé ita instala ona atu responde integradu, sei halo prevensaun no halo asaun represivu, tanba ita-nia PSIK iha ona kompeténsia espesífiku, ita forte ba beibeik hodi hasoru kualker ameasa ba prinsípiu jurídiku internasionál no forma kriminalidade oin-oin.

Iha sorin seluk, Diretór-Nasionál PSIK Dr. Vicente Fernandes e Brito hateten, ita-hotu hatene katak mundu globalizasaun iha prosesu dezenvolvimentu, loke mós oportunidade ba organizasões kriminozas, trans-nasionais, hodi uza forma oin-oin iha aktu kriminalidade ho modus oin-oin no komplexu tebes iha nivel investigasaun.

Komplexidade ne’e, sé ita laiha kapasidade sufisiente atu kombate, sei fó prejuizu ba justisa no tau kauza ba Estadu Direitu. Sé ita hakarak PSIK sai nu’udar polísia sientifíka ida ne’ebé deskoberta verdade material, atua ho forma respeitu absolutu ba direitu, viabilidade prova ho kultura baze sientífika, nune ho instalasaun ekipamentu laboratóriu no formasaun professional ba espesialista no investigadór, nu’udar medida ida ne’ebé urjénte no importante tebes atu fó kredibilidade ba PSIK nia servisu. Ho maneira sira hanesan ne’e mak PSIK bele hetan kredibilidade, konfiansa no rekoñesimentu públiku; hateten Diretór PSIK.

Diretór-Nasionál ne’e mós fó-nia agradesimentu bo’ot ba Señor Ministru Justisa Ivo Valente no Sra. Ana Graça Lima, Koordenadora ba Programa Justisa Uniaun Europeia, ne’ebé mak fó ona apoiu fasilidade laboratóriu ba PSIK no realiza formasaun profesionál ba investigadór PSIK nian.

Partisipa iha serimónia entrega ekipamentu laboratóriu ne’e mak; Ministru Estadu Koordenadór Assuntu Administrasaun Estadu no Justisa, Ministru Administrasaun Estatál Dionísio Babo Soares P.hD., Adjunta Prokuradora-Jeral Repúblika Dra. Zelia Trindade, Embaixadór Portugal iha Timor Leste Dr. Manuel de Jesus Gonçalves, Komandante Jeral PNTL Júlio da Costa Hornai, Komisariu Komisaun Anti-korupsaun Dr. Aderito Tilman, Provedór Direitus Umanus no Justisa Dr. Silveiro Pinto Baptista, Juiz Administradór Tribunál Dili Dr. Duarte Tilman, Diretór-Jerál Ministériu Justisa Dr. Henrique de Oliveira Ximenes, Defensór-Públiku Jerál Dr. Sérgio Hornai, Diretora Centro Formação Jurídica Dra. Marcelina Tilman da Silva, Xéfi Gabinete Ministru Justisa Dr. Evangelino Belo, Formadór sira, ho Xéfi Departementu no Xéfi Seksaun PSIK tomak.

Maria de Lourdes Xavier Lin
Media Officer
Gabinete Ministru Justisa