DILI,MJ-Domingu 26 Outubru 2025 Sua-Eselénsia Ministru Justisa, Dr. Sérgio de Jesus Fernandes da Costa Hornai, hamutuk ho dirijente no funsionáriu sira hosi kada diresaun ne’ebé hamahan aan iha Ministériu Justisa, partisipa serimónia Komemorativa Nasionál ba Asosiasaun Nasaun sira Sudeste Aziátiku nian (ASEAN) ba dala-11, ne’ebé hala’o iha Largo Lisidere, Díli.
Nune’e mós, partisipa hosi dirijente no funsionáriu Polísia Sientífiku Investigasaun Kriminál (PSIK), Defensoria Públika, no reprezentante sira hosi institusaun estadu relevante seluk, hodi sente ondradu tanba ohin Timor-Leste marka tan istória ida importante iha nivel mundiál.

Selebrasaun ida-ne’e, organiza hosi Ministériu Administrasaun Estatál (MAE) ho Ministériu Negósiu Estranjeiru no Kooperasaun (MNEK) no Munisípiu Dili. Tanba momentu istóriku Timor-Leste nia admisaun nu’udár Estadu Membru bá dala-11 hosi Asosiasaun Nasaun sira Sudeste Aziátiku nian (ASEAN).

Hahú iha tuku 5:30 lokraik, iha ne’ebé reprezentante sira husi Governu, Órgaun soberanu sira, Korpu diplomátiku, Ajénsia internasionál, Konfisaun relijioza, F-FDTL no PNTL, Veteranu, Organizasaun sosiedade sivíl, Líder komunitáriu, Estudante, no Sidadaun sira halibur hamutuk hodi asiste no selebra eventu importante ida-ne’e iha istória nasaun nian. Selebrasaun ne’e hala’o mós iha munisípiu 12, Autoridade Administrativa Atauro no Rejiaun Administrativa Espesiál Oecusse-Ambeno (RAEOA).

Povu Timor-Leste agradese estadu membru ASEAN sanulu ne'ebé simu Timor-Leste, no ba sira-nia apoiu iha ita-nia preparasaun ba adezaun. Ita hato'o agradesimentu espesiál ba Malázia ba ninia lideransa nu'udar Prezidente ASEAN.