ROMA,MJ Segunda-Feira 01 Dezembru 2025 Sua-Eselénsia Ministru Justisa Repúblika Demokrátika Timor-Leste, Dr. Sérgio de Jesus Fernandes da Costa Hornai hato’o posisaun firme estadu Timor-Leste la rekoñese pena de morte no pena perpetua iha diskusaun XV kongressu Ministru Justisa Mundiál ne’ebé realiza iha Nouva Aule dei Gruppi Parlamentari, Parlamentu Italianu, Roma-Itália.
Sua-Eselénsia Ministru Justisa Repúblika Demokrátika Timor-Leste, Dr. Sérgio Hornai hato’o kestaun ne’e, iha parte lorokraik liuhosi sesaun Apresentasaun no diskusaun kona-bá importánsia hosi Abolisação Pena de Morte katak, Timor-Leste ne’ebé tuir Orden Konstitusionál Repúblika Demokrátika Timor-Leste la rekoñese pena de morte no pena perpetua.
Minsitru Justisa Timor-Leste esplika, Repúblika DemokrátikaTimor-Leste sai nu’udár prinsípiu ida ne’e foti tanba hare hosi Timor-Leste nia esperiensia moruk iha pasadu iha ne’ebé moruk no nakukun tebes hodi la respeitu ema Timor-oan nia direitu espesiálmente direitu ba moris. Tanba ne’e maka iha sistema jurídiku Nasionál hanesan kódigu penal ne’ebé la aplika pena de morte.
Nune’e mós, Timor-Leste existe polítika komutasaun pena de morte no indultu hosi Prezidente República hanesan dalan ida atu rekupera ema sala na’in no fó tán oportunidade ba nia atu hadi’ak nia moris.

Nasaun hotu iha obrigasaun atu respeita ema nia direitu ba moris, la iha violénsia ba direitu ema nian. Tanba de’it rasa, sexu, orientasaun politika, relijiaun no seluk tan. Governu Itália kontinua firme hodi apoio esforsu tomak ba halakon pena de morte ne’e.
Nune’e mós Ministro da Justiça e Procurador-geral Gambia Sr. Dawda A. Jallow hato'o nia pozisaun katak, nasaun Gambia mos agora bandu ona aplika pena de morte iha sira nia sistema justisa.