DILI,MJ Tersa-Feira 23 Dezembru 2025 Sua-Eselénsia Ministru Justisa, Dr.Sérgio de Jesus Fernandes da Costa Hornai, fó bemvindu ba Sua-Eselénsia Vise-Primeiru-Ministru no Ministru Koordenadór ba Asuntu Ekonómiku, Ministru Turizmu no Ambiente, Dato’ Seri Francisco Kalbuadi Lay, ne’ebé reprezenta Prezidente Repúblika (PR), José Ramos-Horta, no mós Primeiru-Ministru (PM), Kay Rala Xanana Gusmão, iha selebrasaun Natál hamutuk ho prizioneiru sira, iha Estabelecimentu Prizional Becora, Díli. Iha okaziaun ida-ne’e, Ministru Justisa hato’o sentimentu ksolok no agradese tanba bele fila fali hamutuk ho Vise-Primeiru-Ministru no membru Governu sira atu selebra Natál ho prizioneiru sira, hanesan sinal solidariedade, domin no esperansa iha espirítu Natal Kmanek.

“Ha’u sente ksolok tanba bele hamutuk dala-ida tan ho ita-boot sira, ho ita nia Vise-Primeiru-Ministru ne’ebé reprezenta Prezidente Repúblika no Primeiru-Ministru, hamutuk ho membru Governu sira, atu selebra Natál ho prizioneiru sira iha fatin ida-ne’e,” Ministru Justisa, Dr. Sérgio Hornai hateten.
Iha momentu ne’e, Funsionáriu Gabinete Prezidénsia Repúblika, Ministériu Solidaridade Sosiál no Inkluzaun no Ministériu Justisa, fó mós prezenta Natál ba prizioneiru sira, ne’ebé simboliza domin, solidariedade no gratidaun, hanesan atu hamosu jenerozidade no atensaun Governu ba rekonsiliasaun no reintegrasaun sosial.
Selebrasaun ida-ne’e marka dala-ida tan partilla festa Natal Kmanek hamutuk ho estrutura IX Governu Konstitusionál, ne’ebé hatudu domin no konsiderasaun ba prizioneiru sira hanesan ema, ho direitu no dignidade.
Momentu reflesaun espiritualidade mós ne’ebé lidera hosi Padre Kapelaun Francisco Barreto, hodi konvida prizioneiru sira atu halo reflesaun ba sira-nia moris no hadia sira-nia komportamentu.

“Ita-boot sira iha ne’e la’ós de’it atu kumpri pena, maibé mós atu hetan formasaun ida ne’ebé bele ajuda ita-boot sira hadia komportamentu no moris espiritual, hamutuk ho orientasaun hosi Padre Kapelaun Prizaun Bekora, Francisco Barreto” hateten iha reflesaun ne’e.
Ministru Justisa mós subliña katak, liuhosi dedikasaun Guarda Prizional sira, prizioneiru sira hetan orientasaun, avaliasaun no formasaun vokasional tuir padraun lei nasional no instrumentu internasional ne’ebé Timor-Leste ratifika ona.

“Ita-boot sira hetan formasaun, orientasaun no abilidade oioin atu eleva ita-boot sira nia konesimentu, nune’e bainhira remata pena, ita-boot sira bele fila ba família no sosiadade, hodi fó kontribuisaun ba sosiadade ida ne’ebé dinamiku, ho domin no paz,” hateten tan hosi Ministru Justisa.
Iha remata, Ministru Justisa, Dr. Sérgio Hornai, husu ba prizioneiru sira atu hatudu komportamentu di’ak, disiplina, obedénsia no koopera ho autoridade no entidade sira ne’ebé responsabiliza ba administrasaun no reintegrasaun prizionál.
Iha serimónia Natál ne’e, partisipa mós hosi Ministra Edukasaun, Dulce de Jesus Soares; Ministra Solidariedade Sosiál no Inkluzaun, Verónica das Dores; Vise-Ministra Solidariedade Sosiál no Inkluzaun, Céu Brites; Sekretáriu Estadu Asuntu Toponímia no Organizasaun Urbana, Germano Santa Brites Dias; no mós Adjunta Casa Civil no Asesór ba Asuntu Sosiál Palásiu Prezidensiál.