DILI,MJ Kinta-Feira 05 de Fevereiro 2026 Sua-Eselénsia Ministru Justisa, Dr. Sérgio de Jesus Fernandes da Costa Hornai, prezide enkontru servisu entre ekipa Teknolojia Informasaun no Komunikasaun (TIC), Unidade Arendamentu Beins Imoveis (UABIE) no Diresaun Nasional Teknolojia Information (DNTI) Ministériu Justisa, hodi diskute kona-bá “Sistema Informasaun Jestaun Rai” (LMIS sigla Ingles) liuhosi prosesu dizitalizasaun, ne’ebé hala’o iha sala sorumutu Ministériu Justisa, Kolmera, Díli.

Objetivu hosi enkontru ne’e, atu halo avaliasaun sistema dijitál iha área Ministeriu justisa, liu-liu iha DGTP, no mós atu fortifika dezenvolvimentu no modernizasaun sistema sira ne’ebé eziste, hodi asegura efisiénsia, transparénsia no kualidade servisu justisa, tuir prinsipiu boa governasaun.
Ministru Justisa husu ba ekipa TIC, UABIE no DNTI atu kontinua servisu ho kompromisu aas, inovasaun no responsabilidade, hodi apoia reforma justisa no modernizasaun institusionál, tuir prioridade Governu Konstitusionál. Nu’udar rekomendasaun estratéjika, hodi garante katak sistema dijitál iha Ministériu Justisa bele responde ba nesesidade iha rai laran.

Iha reuniaun ne’e, Minsitériu Justisa partisipa hanesan; Diretór Jeral Polítika Justisa, Dr. Nelinho Vital, Diretór Nasionál Teknolojia no Informatika Ministériu Justisa, Sebastião Domingos Freitas Belo, Xefe UABIE, Helder Cosme Marcal, ekiparadu Diretór Jerál Terras Propriedades. Nune’e mós ekipa sira hosi TIC maka hanesan; Xefe Departamentu Treinamentu no Jestaun Sistema Informasaun, Norberto Soares Cristovão, Xefe Departamentu Dezenvolvimentu Implementasaun no Integrasaun Sistema, Geovannio Frederico de Jesus Vinhas no seluk tan.