DILI,MJ Tersa-Feira 10 de Fevereiro 2026 Sua-Eselénsia Ministru Justisa, Dr. Sérgio de Jesus Fernandes da Costa Hornai, halo reuniaun ho Secretário-Geral Adjunto da Conferência dos Ministros da Justiça dos Países de Língua Oficial Portuguesa (CMJPLOP), Dr. João Arcénio Oliveira ho komitíva, iha sala sorumutu Ministériu Justisa, edifísiu Ministériu Justisa, Kolmera, Díli.
Objetivu hosi reuniaun ne’e, atu halo preparasaun no koordenasaun ba prosesu pasajen Prezidénsia Conferência dos Ministros da Justiça dos Países de Língua Oficial Portuguesa (CMJPLOP), hosi São Tomé no Príncipe ba Repúblika Demokrátika Timor-Leste, ba períodu tinan 2026 to’o 2028, hodi garante kontinuidade, efisiénsia no konsolidasaun kooperasaun iha área Justisa entre Estadu-membru sira.

Timor-Leste simu Prezidénsia tanba mudansa situasaun polítika ne’ebé akontese iha Guiné-Bissau. Ho nune’e, Xefe Estadu sira hosi Comunidade dos Países de Língua Portuguesa (CPLP) deside atu atribui Prezidénsia ba Timor-Leste ba períodu tinan rua, inklui mós Prezidénsia Conferência dos Ministros da Justiça dos Países de Língua Oficial Portuguesa (CMJPLOP).
Sua-Eselénsia Ministru Justisa hola desizaun estratéjika atu sai uma na’in no lidera prosesu organizasaun ba atividade sira iha área Justisa ba tinan rua, hodi garante kontinuidade, koordenasaun no implementasaun politika sira ne’ebé efetivu. Reflete kompromisu Ministériu Justisa atu konsolida parsería institusionál, hametin kapasidade nasional no promove prátika di’ak iha nivel rejionál no internasionál.

Nune’e mós, foka ba avaliasaun no balansu kooperasaun entre Repúblika Demokrátika Timor-Leste no Repúblika Portuguesa iha setor Justisa. Reprezentante Ministru Justisa Portugal, Dr. João Arcénio Oliveira, subliña importánsia papel Ordem dos Advogados hanesan parseiru estratéjiku atu hadia kapasidade profisionál, adapta prátika jurídika ba era dijitál, no garante asesu ba justisa ne’ebé transparente, efikás no inkluzivu ba sidadaun sira hotu.
Iha reuniaun ne’e, akompaña Ministru Justisa, Dr. Sérgio Hornai hosi dirijente sira diresaun tuteladu sira iha ambitu Ministériu Justisa. Nune’e, bele koordinadu no suporta programa estratega eventu ne’e.