TOQUIO,MJ Quarta-Feira 04 de Marsu 2026 Sua-Eselénsia Ministru Justisa, Dr. Sérgio de Jesus Fernandes da Costa Hornai, hamutuk ho delegasaun ofisiál Ministériu Justisa, nomos Sra. Embaixadora Timor-Leste ba Japão , sra. Maria Teresinha desloka hosi Tóquio ba Fukuyama.
Objetivu visita ba iha Fukuyama ne'e, Sua-Eselénsia Ministru Justisa ho Embaixadora Estraordinária no Plenipotenciária RDTL iha Japão, Maria Terezinha da Silva Viegas no delegasaun sira atu realiza enkontru no halo observasaun ba Tsuneishi Shipbuilding Co., Ltd.
Kompañia Tsuneishi Shipbuilding Co., Ltd. nu’udár investór estranjeiru ida ne’ebé sei realiza investimentu kona-ba konstrusaun fábrika Ro Ahi iha Postu Administrativu Laleia, Munisípiu Manatuto, ne’ebé previstu atu hahú iha fulan Marsu tinan 2026

Aleinde ne’e, kompañia ne’e mós halo ona prosesu rekrutamentu ba Timor-oan hamutuk ema na’in 35, ne’ebé dadaun hahú ona servisu iha área téknika sira hanesan dezeñu Ro, soldadura no pintura Ro nian, ho objetivu atu hasa’e kapasidade rekursu umanu nasional no kontribui ba dezenvolvimentu setór industriál iha Timor-Leste.
Aproveita vizita ofisial ida-ne’e, Sua-Eselénsia Ministru Justisa hamutuk ho Embaixadora Estraordinária no Plenipotensiária Repúblika Demokrátika Timor-Leste iha Japaun halo mós reuniaun ho traballadór Timor-oan sira ne’ebé hela no servisu iha Fukuyama, Japaun, hodi hatene diretamente sira-nia dezenvolvimentu no progresu servisu durante períodu formasaun no esperiénsia profisionál iha nasaun ne’e.

Tuir planu hosi Tsuneishi Shipbuilding Co., Ltd., traballadór Timor-oan sira ne’e sei fila fali ba Timor-Leste atu kontinua servisu iha fábrika ne’ebé sei hari iha Postu Administrativu Laleia, Munisípiu Manatuto, nu’udar parte hosi implementasaun projetu investimentu industriál iha país