DILI,MJ Tersa-Feira 31 de Marsu 2026 Sua-Eselénsia Ministru Justisa, Dr. Sérgio de Jesus Fernandes da Costa Hornai nu’udár Prezidente Konsellu CFJJ, prezide reuniaun Konsellu Jeral Centro de Formação Jurídica e Judiciária (CFJJ sigla portugés), ho objetivu atu diskute planu no estratéjia ba reforsu kapasidade profisionál jurídiku iha sistema judisiáriu Timor-Leste, iha sala Gabinete Ministru Justisa, edifísiu Ministériu Justisa, Kolmera, Díli.
Membru Konsellu Geral sira halo análise kle’an kona-bá nesesidade atu kontinua hadia kualidade formasaun jurídika no judisiária, liu-liu ba dezenvolvimentu kompeténsia téknika no étika profisionál ba majistradu no profisionál jurídiku sira. Foka mós ba inovasaun iha métodu formasaun, inklui integrasaun teknolojia no abordajen pedagójika modernu hodi responde ba dezafiu atual sira iha setor justisa.

Iha okaziaun ne’e, partisipa másimu hosi membru Konsellu Jeral CFJJ sira hanesan; Prokuradór Jeral Repúblika, Dr. Nelson de Carvalho, Prezidente do Conselho Gestão no Diciplina Advokasia atual Diretór Jeral Politika Justisa, Dr. Nelinho Vital, Defensor Públiku Jerál, Dr. Câncio Xavier, Diretór Nasionál CFJJ, Dr. Francisco Xavier Vasco Soares no Koordenador CFJJ.