DILI,MJ Tersa-Feira 12 de Maiu 2026 Sua-Eselénsia Ministru Justisa, Dr. Sérgio de Jesus Fernandes da Costa Hornai, realiza enkontru ofisiál ho Embaixadór Repúblika Koreia iha Timor-Leste, Chang Ha Yeon, ne'ebé foin nomeia nu'udar Embaixadór Repúblika Koreia ba Timor-Leste.
Enkontru ida-ne’e, hala’o iha sala sorumtuk Gabinete Ministru Justisa, edifísiu Ministériu Justisa, Kolmera, Díli, ho objetivu atu habelar no hametin relasaun diplomátika entre Ministériu Justisa no Governu Repúblika Koreia, liuliu iha área justisa, dezenvolvimentu rekursu umanu, modernizasaun servisu administrativu, no kooperasaun téknika entre instituisaun rua ne’e.

Iha oportunidade ne’e, Ministru Justisa mos manifesta esperansa atu kooperasaun bilateral entre Ministériu Justisa Timor-Leste no instituisaun relevante sira hosi Repúblika Koreia bele kontinua reforsa no dezenvolve liu tan iha futuru, partikularmente iha área formasaun profisionál, modernizasaun servisu administrativu no apoiu tékniku ba reforma setor justisa.
Embaixadór Repúblika Koreia iha Timor-Leste, Chang Ha Yeon, mos transmite ninia komprimentus ba Ministériu Justisa Timor-Leste no expresa apresiasaun sinseru ba kooperasaun di’ak no relasaun exelente entre instituisaun rua ne’e durante tempu tomak.