DILI,MJ Sesta-Feira 22 de Maiu 2026 Sua-Eselénsia Ministru Justisa, Dr. Sérgio de Jesus Fernandes da Costa Hornai, aprezenta iha ambitu Audénsia Públika bá Orsamentu Ratifikativu ba tinan fiskál 2026, ne’ebé realiza iha sala enkontru Komisaun A Parlamentu Nasional, Díli.
Prezidente Komisaun A ne’ebé trata kona-bá asuntu Konstitusionál no Justisa, deputadu Natalino dos Santos konvida dirijente sira hosi setor Justisa hodi diskute bá Proposta Lei nu 31/VI (3ª) – Primeira alterasaun ba Lei nu 8/2025, loron 27 fulan novembru, Orsamentu Jeral Estadu ba 2026 nian.
Ministru Justisa, Dr. Sérgio Hornai, reafirma situasaun jeral no proposta Orsamentu Ratifikativu hosi Ministériu Justisa ne’ebé halo redusaun ba montante aprosimadamente USD $ 65.976,00, iha audiénsia públika ho Komisaun A Parlamentu Nasional, ne’ebé responsavel ba asuntu Konstituisional no Justisa.

Ministériu Justisa hakarak kontribui ba desizaun Governu atu halo redusaun no ajustamentu ba orsamentu ratifikavu tinan fiskal 2026. Tanba situasaun jeopolítika ne’ebé daudaun Timor-Leste hasoru hela. Medida ida-ne’e importante atu garante sustentabilidade finanseira Estadu no asegura kontinuidade fornesimentu enerjia eletrisidade ba povu.
Ministru Justisa felisita agradesimentu ba Prezidente Komisaun A ne’ebé trata kona-bá asuntu Konstitusionál no Justisa, deputadu Natalino dos Santos hamutuk ho membru komisaun sira hosi bankada Governu no mós bankada oposisaun.
Iha audénsia ne’e mós partisipa hosi Prezidente Tribunal Rekursu, Dr. Afonso Carmona, Prokuradór Jerál Repúblika, Dr. Nelson de Carvalho, Defensór Públiku Jerál, Dr. Câncio Xavier, no Diretór Polísia Siéntifika Investigasaun Kriminal (PSIK), Dr. Vicente Fernandes e Brito hato’o sira-nia kontribuisaun kona-bá prioridade institusionál no nesesidade Orsamentu Ratifikativu tinan fiskál 2026 iha setor justisa.

Nune’e mós, Diretor Jeral Politika Justisa, Dr. Nelinho Vital, Diretor Jeral Terras no propriedades, Diretor Jeral Servisu Rejistu no Notariadu no tékniku sira seluk hosi Minsitériu Justisa.