LISBOA,MJ Quarta-Feira 24 de Junho 2026 Sua-Eselénsia Ministru Justisa, Republika Demokratika Timor-Leste, Dr. Sérgio de Jesus Fernandes da Costa Hornai, hasoru malu ho Ministra da Justiça da República Portuguesa, Dra. Rita Júdice, iha edifísiu Ministériu da Justiça, Praça do Comércio, Lisboa, Portugál.
Enkontru ida ne’e realiza hanesan parte husi agenda servisu oficial Sua-Eselénsia Primeiru-Ministru nian iha República Portuguesa, ne’ebé Ministru Justisa akompaña durante vizita traballu refere. Iha kontestu ida ne’e, Ministru Justisa aproveita oportunidade atu hala’o sorumutu bilateral ho nia homólogu portuguesa hodi hametin liután relasaun kooperasaun entre Timor-Leste no Portugál iha área justisa.
Durante Ministru Justisa Timor-Leste no Ministra Justisa Portugál, troka hanoin no diskusaun aprofundadu kona-bá medidas estratéjikas atu hametin liu tan kooperasaun bilateral iha setor justisa entre Timor-Leste no Portugal. Iha enkontru ne’e, parte rua fó atensaun espesial ba reforsu kapasidade rekursu umanu, liuliu ba autoridade judisiál Timor-oan sira, hodi asegura dezenvolvimentu profisionál no konsolidasaun sistema justisa nasional.

Iha oportunidade ne’e, Ministru Justisa mós hato’o konvite ofisiál ba Ministra da Justiça da República Portuguesa atu partisipa iha XIX Conferência dos Ministros da Justiça dos Países de Língua Oficial Portuguesa (CMJPLOP), ne’ebé tuir planu sei realiza iha Dili, iha fulan Outubru tinan 2026.
Diskusaun-ne’e, inklui kontinuidade apoiu ba prosesu formasaun iha Centro de Formação Jurídica e Judiciária (CFJJ), no implementasaun programa Formasaun ba Formadores Jurídiku Timor-oan sira, ne’ebé previstu atu hahú iha tinan 2027.
Konvite ida-ne’e, nu’udar parte husi kompromisu Estadu Timor-Leste nian durante hala’o knaar hanesan Prezidénsia Pro Tempore Comunidade dos Países de Língua Portuguesa (CPLP), ho objetivu atu hametin relasaun kooperasaun no promove partisipasaun membru Estadu sira iha atividade importante sira ne’ebé organiza husi Timor-Leste.

Nune’e mós, Ministra Justiça Portuguesa entrega livru sira kona-ba koletânea Lejislasaun Timor-Leste nian ba Ministru Justisa Timor-Leste. Livru sira ne’e nu’udar rezultadu husi servisu tekniku ne’ebé hala’o husi Direção-Geral de Política de Justiça, liuhusi publikasaun Volume II, ne’ebé reúne no sistematiza instrumentu jurídiku importante sira atu fasilita asesu ba informasaun lejislativa no suporta dezenvolvimentu sistema justisa nasional.
Iha okaziaun ne’e, akompaña Ministru Justisa, Dr. Sérgio Hornai, sr. Manuel Serrano, Embaixadór Extraordináriu no Plenipotensiáriu Timor-Leste nian ba Portugal; Diretór-Jerál Polítika Justisa, Ministériu Justisa; Sr. Nelinho Vital, Adidu Justisa Timor-Leste nian iha United Kingdom; Sr. Flaviano Leão Moniz, Assessora Jurídika, Mariana Machado Gomes.