DILI,MJ Kinta-Feira 02 Jullu 2026 Ministru Justisa, Dr. Sérgio de Jesus Fernandes da Costa Hornai, lidera reuniaun konsultativu ho dirijente sira hotu iha Ministériu Justisa hodi fó orientasaun estratéjika no husu ba diresaun tuteladu sira no unidade orgánika ida-idak atu halo identifikasaun ba atividade prioritária sira, prepara proposta orsamentu ba Tinan Fiskál 2027.
Reuniaun ne’e, realiza iha Sala Reuniaun Ministériu Justisa, Kolmera, Díli, ho objetivu atu asegura katak proposta orsamentu ne’ebé sei submete reflete prioridade estratéjika Ministériu Justisa, planeamentu estratéjiku, no mekanizmu preparasaun no alokasaun orsamentu ba Tinan Fiskál 2027, hodi garante implementasaun programa no atividade sira ne’ebé efetivu, efisiente no sustentavel.

Iha abertura reuniaun ne'e, Ministru Justisa reafirma, preparasaun proposta orsamentu tenke hala'o ho planeamentu ne'ebé rigorozu, bazeia ba nesesidade institusionál no prioridade estratéjika sira, atu asegura alokasaun rekursu públiku ne'ebé efetivu, efisiente no responsavel.
“Husu ba dirijente sira hodi garante atividade hotu-hotu ne'ebé propoin sei iha ligasaun direta ho objetivu polítika, programa no rezultadu ne'ebé Ministériu Justisa hakarak atinje iha Tinan Fiskál 2027” Ministru Justisa hateten iha reuniaun importante ne’e.
Elaborasaun proposta orsamentu la'ós de’it atu priense nesesidade administrativu, maibé tenke sai hanesan instrumentu estratéjiku ida hodi sustenta implementasaun programa no reforma prioritária sira iha setor justisa, inklui fortalesimentu kapasidade institusionál, melloria prestasaun servisu públiku, no asesu ba justisa ba sidadaun sira.

Ministériu Justisa nia diresaun sira no tuteladu sira bele submete proposta atividade no orsamentu ne'ebé fundamentadu ho justifikasaun téknika, no orientadu ba rezultadu, atu fasilita prosesu konsolidasaun proposta Orsamentu Ministériu Justisa ba Tinan Fiskál 2027.
Ministru Justisa afirma, ba dirijente sira hotu iha Ministériu Justisa atu fó atensaun másimu ba planeamentu no preparasaun programa sira ho di'ak. Tanba planeamentu ne'ebé rigorozu, realista no orientadu ba rezultadu mak sai hanesan baze prinsipal hodi garante atividade sira ho efisiente no efetivu.