DILI,MJ Sesta-Feira 03 Jullu 2026 Ministru Justisa, Dr. Sérgio de Jesus Fernandes da Costa Hornai, hala’o reuniaun ho Reprezentante Rezidente Grupu Banku Mundiál ba Timor-Leste, David Freedman, hodi diskute kona-bá polítika ekonómia, oportunidade investimentu no hametin kooperasaun estratéjika entre Governu Timor-Leste no Banku Mundiál iha área sira ne’ebé suporta dezenvolvimentu nasional.
Reuniaun ne’e, hala’o iha sala gabinete Ministru Justisa, Ministériu Justisa, Kolmera, Díli. Hodi fó atensaun espesiál ba asuntu terras no propriedades, liuliu kona-bá aspetu legal, administrativu no prosedimentu sira ne’ebé relasiona ho utilizasaun rai no propriedade.
Parte rua ne’e mós, troka hanoin kona-bá polítika ekonómia ne’ebé bele fó apoiu ba dezenvolvimentu setor enerjia renovável, liuliu implementasaun programa eletrifikasaun ne’ebé uza solar panel, hodi aumenta asesu komunidade sira ba eletrisidade, hamenus dependénsia ba enerjia fósil no promove dezenvolvimentu sustentável tuir kompromisu Governu nian ba tranzisaun enerjétika.
Objetivu prinsipál mak kria ambiente regulatóriu ne’ebé favorável, hametin seguransa ba investimentu no promove parseria entre Governu, setór privadu no parseiru dezenvolvimentu sira.

Iha kontestu ida ne’e, diskute mós oportunidade atu atrai investimentu husi kompania nasionál no internasionál sira atu partisipa iha dezenvolvimentu, fornesimentu no instalasaun sistema solar panel iha Timor-Leste.
Durante reuniaun ne’e, Ministru Justisa subliña, Ministériu Justisa kontinua empenha atu reforsa sistema legal no institusionál ne’ebé bele garante seguransa jurídika, aumenta konfiansa investidór sira no suporta kresimentu ekonómiku inkluzivu no sustentável.
Reprezentante Rezidente Grupu Banku Mundiál ba Timor-Leste reafirma Banku Mundiál nia kompromisu atu kontinua fó apoiu tékniku no estratéjiku ba Governu Timor-Leste, liuliu iha área reforma legal, governasaun, administrasaun rai no polítika sira ne’ebé bele impulsiona investimentu no dezenvolvimentu ekonómiku.
Ikusmai, Ministru Justisa, Dr. Sérgio Hornai, no Reprezentante Rezidente Grupu Banku Mundiál ba Timor-Leste, David Freedman, konkorda atu kontinua hametin koordinasaun no mekanizmu follow-up ba atividade no programa kooperasaun sira ne’ebé implementa hamutuk entre Banku Mundiál no Ministériu Justisa.