DILI,MJ Tersa-Feira 21 Jullu 2026 Ministru Justisa, Dr. Sérgio de Jesus Fernandes da Costa Hornai, realiza reuniaun ho Prezidente Komisáriu Terras no Propriedades, hamutuk ho membru sira no Sekretáriu Ezekutivu, atu diskute prioridade servisu institusionál, avalia progresu implementasaun programa sira no identifika dezafiu sira ne'ebé hasoru iha jestaun terras no propriedades.
Durante reuniaun ne'e, partisipa sira halo mós diskusaun kona-ba medida estratéjika sira atu hasa'e efisiénsia no efetividade prestasaun servisu públiku, hametin koordenasaun interinstitusionál, no garante jestaun terras no propriedades ne'ebé transparante, responsável no tuir prinsípiu legalidade, atu responde di'ak liu ba nesesidade no interese sidadaun sira.
Ministru Justisa enfatiza importánsia jestaun rai no propriedades ne'ebé transparante, responsável no tuir lei, atu responde ba preokupasaun komunidade kona-ba direitu ba rai. Nia mós husu Komisáriu kontinua hametin koordenasaun ba levantamentu istóriku no sistemátiku, hodi acelera prosesu regularizasaun propriedades no kontribui ba rezolusaun disputa rai ho forma justu, imparsiál no fundamenta ba lei.

Ministru reafirma ninia konfiansa ba lideransa no membru Komisáriu Terras no Propriedades, no apela atu kontinua hala'o servisu ho integridade, profesionalizmu no responsabilidade. Nia mós husu instituisaun ne'e prepara planeamentu komprensivu ba programa no atividade sira atu hasa'e efisiénsia servisu no implementa politika Governu iha área terras no propriedades.
Reuniaun ne'e reflete kompromisu Ministériu Justisa atu hametin governasaun di'ak, transparénsia no seguransa jurídika, hodi garante direitu no interese sidadaun sira tuir Konstituisaun no lei sira ne'ebé vigora iha Timor-Leste.