DILI,MJ Sesta-Feira 24 Jullu 2026 Ministru Justisa, Dr. Sérgio de Jesus Fernandes da Costa Hornai, hala’o entrevista ho Dosente Direito iha Kent Law School, University of Kent, United Kingdom, Dra. Sapna Reheem Shaila, iha Sala Gabinete Ministru Justisa, Kolmera, Díli.
Entrevista ne’e realiza nu’udar parte husi atividade akadémika no investigasaun sientífika ne’ebé Dra. Sapna Reheem Shaila hala’o, ne’ebé foka ba dezenvolvimentu sistema justisa, reforma legál no governasaun iha Timor-Leste.
Durante entrevista ne’e, Dra. Sapna Reheem Shaila husu informasaun kona-ba dezenvolvimentu sistema judisiál iha Timor-Leste, liuliu kona-ba oinsá atór judisiál sira hala’o sira-nia knaar no responsibilidade iha sistema justisa ida ne’ebé sei iha prosesu konsolidasaun no fortalese instituisaun sira.
Iha oportunidade ne’e, Dra. Sapna Reheem Shaila hateten katak objetivu prinsipal husi nia investigasaun mak atu komprende oinsá Timor-Leste, nu’udar nasaun demokratiku ida ne’ebé relativamente foun, konsege harii no dezenvolve sistema justisa ida ne’ebé estável, independente, efetivu no tuir prinsípiu Estadu de Direitu Demokrátiku.

Ministru Justisa, Dr. Sérgio de Jesus Fernandes da Costa Hornai, apresia inisiativa akadémika ida-ne’e no reafirma katak Ministériu Justisa nafatin apoiu kooperasaun ho instituisaun akadémika no investigadór internasionál sira, tanba rezultadu husi investigasaun sientífika bele kontribui ba hadi’a polítika públika, reforma legál no hametin setor justisa iha Timor-Leste.