DILI,MJ Quarta-Feira 29 Jullu 2026 Ministru Justisa, Dr. Sérgio de Jesus Fernandes da Costa Hornai, simu vizita kortezia hosi Senhora, Adjunta Sekretáriu-Jerál Association of Southeast Asian Nations (ASEAN) ba Komunidade Polítika no Seguransa (ASEAN Political-Security Community – APSC), Dato’ Astanah Abdul Aziz, hamutuk ho nia komitiva, iha Sala Reuniaun Ministériu Justisa, Kolmera, Díli.
Ministru Justisa konta, Ministériu Justisa simu vizita hosi Sekretária-Jerál ASEAN ne’ebé mai iha kontektu partisipasaun iha formasaun kona-bá seguransa, justisa no direitu umanus, inklui relasionamentu iha área defeza no polítika seguransa.
Parte rua diskute kona-ba preparasaun adezaun Timor-Leste ba ASEAN, liu-liu oinsa Ministériu Justisa nia knaar sira hodi implementa komprimissu ASEAN nian, liu-liu pilar politika seguransa nian (APSC).

Diskusaun ne’e mós, aborda nesesidade atu reforsa kooperasaun no garante adaptasaun polítika no lei Timor-Leste nian tuir vizaun no estatutu ASEAN. No mós troka hanoin kona-bá apoiu tékniku hosi Sekretariadu ASEAN, liuhosi Adjuntu-Sekretáriu-Jerál, hodi fortalese servisu tékniku ASLOM no diskusaun temátika entre Diretór-Jerál sira no Diretór Nasionál sira.
Durante enkontru ne’e, parte rua diskute mós kona-ba apoiu asisténsia téknika hosi Sekretariadu ASEAN ba preparasaun Ministériu Justisa, liuliu atu reforsa kapasidade institusionál no prepara partisipasaun Timor-Leste iha ASEAN Law Ministers Meeting (ALAWMM), ASEAN Senior Law Officials Meeting (ASLOM), ne’ebé Timor-Leste sei lidera iha tinan 2028, no mós ba reuniaun téknika sira seluk ne’ebé relevante iha setor justisa

Senhora Adjunta fó hanoin tan katak, Timor-Leste presiza hametin koordinasaun no mekanizmu polítika ida ne’ebé integra interasaun bilateral no multilateral iha nivel tékniku, atu asegura prosesu hotu dokumentadu no implementadu tuir padraun no interese komún ASEAN.