DILI,MJ Segunda-Feira 17 Agostu 2026 Ministru Justisa, Dr. Sérgio de Jesus Fernandes da Costa Hornai, aprezenta no defende prioridade estratéjika iha Ministériu Justisa liu-liu área terras no propriedades, iha reuniaun Komité Revizaun Polítika (KRP) iha ámbitu prosesu preparasaun Orsamentu Jerál Estadu (OJE) ba tinan 2027, iha Ministériu Finansa, Aitarak-Laran Díli.
Oportunidade ne’e, fó atensaun ba revizaun no avaliasaun prioridade polítika Governu, ho objetivu atu asegura katak alokasaun rekursu públiku iha OJE 2027 aliña ho prioridade estratéjika Governu, kapasidade finanseira Estadu no nesesidade dezenvolvimentu nasionál.
Iha prosesu KRP, Governu analiza proposta prioridade polítika sira, inklui medida atu kria espasu fiskál, responde ba presaun husi prioridade Governu Sentrál, no konsidera oportunidade no nesesidade investimentu iha setór importante sira, hanesan saúde, edukasaun, agrikultura no área produtiva sira seluk.

Ministru Justisa argumenta prioridade estratéjika Ministériu Justisa, liuliu iha área Reforma Institusional, Seguransa Juridika, Hadia Sistema Justisa no Reforma Setor Terras no Propriedades, ho objetivu atu kontribui ba kresimentu ekonómiku no dezenvolvimentu sustentável Timor-Leste.
Ministru Justisa, hamutuk ho Sekretáriu Estadu ba Terras no Propriedades, Eng. Jaime Xavier Lopes, no dirijente sira relevante, aprezenta no enfatiza prioridade estratéjika PPG-27, ne’ebé foka ba kadastru no siguransa juridika terras no propriedades iha Timor-Leste.
PPG-27 fó prioridade ba hadi’a sistema kadastru no rejistu propriedade, redús disputa sira, aumenta seguransa jurídika, digitaliza no moderniza jestaun dadus, haforsa kapasidade institusionál no rekursu umanu, no kria ambiente ne’ebé favorável ba investimentu no dezenvolvimentu ekonómiku.
Ministru mós fó atensaun ba dezenvolvimentu institusionál no haforsa kapasidade rekursu umanu, liuliu kuadru tékniku no pesoál sira ne’ebé responsavel ba levantamentu, kadastru, regularizasaun no servisu predial iha área terras no propriedades, hahú hosi nivel nasionál to’o munisípiu sira.
Iha situasaun atual, Ministériu Justisa, liuhosi Diresaun Terras no Propriedades, kontinua hala’o prosesu levantamentu, regularizasaun no emisaun titulu ba propriedades. To’o agora, foin atinji deit 578 parselas.

Ho indikadór no meta ne’ebé aprezenta ba Governu, Ministériu Justisa reafirma kompromisu atu, to’o tinan 2031, kontinua hasa’e kapasidade institusionál, produtividade no efisiénsia servisu, ho objetivu atu atinji meta 30.000 parselas, no hametin sistema jestaun terras no propriedades ne’ebé efisiente, transparente no orientadu ba nesesidade sidadaun sira.
Iha reuniaun KRP ne’e, lidera hosi Primeiru-Ministru, Kay Rala Xanana Gusmão, hamutuk ho Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, no Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, hamutuk ho Komisaun Polítika Revizaun Polítika IX Governu Konstitusionál.
Ministériu Justisa hetan aprovasaun ho kondisaun, ne’ebé sai oportunidade estratéjika atu harmoniza prioridade polítika, kapasidade institusionál no rekursu orsamentál, hodi asegura katak programa no atividade sira iha área terras no propriedades bele implementa ho orientasaun ne’ebé klaru, objetivu ne’ebé mensurável no rezultadu ne’ebé konkretu, efetivu no fó benefísiu direta ba sidadaun sira.
Ministériu Justisa reafirma kompromisu atu kontinua apoia reforma no modernizasaun setor terras no propriedades, hodi hametin seguransa jurídika, hadi’a qualidade servisu públiku, aumenta konfiansa sidadaun no kontribui ba kresimentu ekonómiku no dezenvolvimentu sosial sustentável Timor-Leste.