DILI,MJ Sesta-Feira 04 Setembru 2026 Ministru Justisa, Dr. Sérgio de Jesus Fernandes da Costa Hornai, hala’o enkontru ho Reprezentante Rezidente Banku Mundiál, David Freedman, ho nia komitiva, hodi diskute no avalia progresu, dezafiu no prioridade sira iha área Jestaun Terras no Propriedades, iha Timor-Leste.
Iha sala Gabinete Ministru Justisa, Kolmera, Díli. Ministru Justisa hateten, asuntu Terras no Propriedades iha Timor-Leste kompleksu no presiza abordajen integrada no sustentável. Enkontru ho Banku Mundiál sai oportunidade importante hodi hametin koordenasaun no kompromisu, liuliu iha hadia jestaun no prestasaun servisu iha área Terras no Propriedades.
Prioridade sira ne’ebé diskute inklui modernizasaun sistema kadastral, levantamentu no atualizasaun dadus terras, prosesu atribuisaun sertifikadu rai, modernizasaun sistema informasaun kona-ba terras, no haforsa kapasidade institusionál. Medida sira-ne’e, atu asegura prestasaun servisu ne’ebé efisiente, transparente no fó seguransa jurídika ba sidadaun sira.
Ba períodu oin mai, Governu sei kontinua aselera servisu kadastral no prosesu atribuisaun sertifikadu rai, ho objetivu atu hadia efisiénsia no transparénsia, no hametin seguransa jurídika kona-ba direitu ba terras no propriedades iha Timor-Leste.

Ministru Justisa, Dr. Sérgio Hornai subliña, Ministériu Justisa no Banku Mundiál kontinua hamutuk iha koordenasaun no kooperasaun téknika, hodi buka solusaun realistiku, sustentável no responde ba nesesidade nasional iha área terras no propriedades.
Reprezentante Rezidente Banku Mundiál, David Freedman, hato’o apresiasaun ba oportunidade atu revitaliza no hametin kooperasaun ho Ministériu Justisa, liuliu iha área terras no propriedades. Kooperasaun ne’e foka ba avaliasaun progresu, hadi’a produtividade no efisiénsia prosesu kadastral, no aumenta kapasidade atu prosesadu no rejista parselas terras.
Kooperasaun sei kontinua ho prioridade ba modernizasaun sistema kadastral, hadi’a jestaun no asesu ba dadus terras, no haforsa kapasidade institusionál, hodi asegura servisu públiku ne’ebé lalais, transparente, eficiente no fó seguransa jurídika ba sidadaun sira. Ministériu Justisa reafirma kompromisu kontinua servisu hamutuk ho Banku Mundiál no parseiru dezenvolvimentu sira atu apoia reforma no dezenvolvimentu setor terras no propriedades iha Timor-Leste.