Dili Centro Formação Jurídica (CFJ) iha loron 14 fulan Outubro 2013, halao serimónia graduasaun ba 33 advogados privados husi 2º Kurso Formasaun ba Advogados Privados, neébe konklui ho suseso faze formasaun rua, kompostu husi faze eskolar fulan sanolu resin lima no faze estájio fulan sia, organiza husi Centro Formação Jurídica, haktuir artigo 11º , Lei n.º 11/2008, konaba rejime jurídiko advokasia privada no formasaun ba advogados.

Serimónia neé prezidi husi Ekselénsia Ministro Justisa, DR. Dionísio da Costa Babo, no marka mos prezensa Vice-Ministro, Dr. Ivo Valente, reprezentante Tribunal Recurso, Dr. Antonino Gonçalves, reprezentante Procuradoria Geral República, Dra. Zélia Trindade, Koordenador Geral Defensoria Pública, Dr. Sérgio Hornai, Diretora CFJ, Dra. Marcelina Tilman, Presidente Conselho Gestão e Disciplina da Advocacia, Dr. Nelinho Vital, Diretora UNDP iha Timor-Leste, Dra. Mikiko Tanaka, Diretores Nasionais

Ministério Justiça, reprezentante embaixada estranjeira, reprezentantes eskritórios advogados internacionais iha Timor-Leste no personalidade sektor Justisa oi-oin, sosiedade sivil no religiosa no mos ho advogado sira nia familia.
Iha diskurso Ministro Justisa hatoó katak iha nesesidade atu Timor-Leste iha advogados privados neébe diak, atu nuneé iha futuro hodi bele garante no kontribui ba boa administrasaun justisa, hodi salvaguarda direitos no interese lejítimo sidadaun sira nian. hatutan tan katak governo aktual halo esforso makaas hodi kontinua haforsa investimento ba formasaun iha CFJ, iha nível disiplina jurídika, língua portuguesa no tétum jurídico.

Ministro Justisa afirma katak, foin dadaun halo reforma orgânika ba CFJ, ho objektivo prinsipal hodi reforsa ninia misaun, buka konsolida metodolojia no estratéjika haktur iha projekto pedagójiko neébe koerente hodi bele kontribui ba formasaun espírito no konsiénsia majistrados no defensores no ikus liu atu haforsa konfiansa iha tribunal sira no lejitimidade poder judisial.
Aproveita oportunidade hodi bolu atensaun ba deveres deontolójikos neébe Lei nº 11/2008 impoim ba advogados, liliu bainhira halao sira ninia knaar profisional, tenke komporta nuúdar servidor justisa no direito, nuneé tenke honra ba dignidade no responsabilidade neébe haktur ba advogado sira.

Bainhira remata diskurso, Ministro Justisa fo hanoin hikas ba advogado foun sira konaba dever no obrigasaun neébe hetan konfiansa husi povo timor oan bainhira husu ka halai ba justisa, fo hanoin mos katak sektor justisa dezempeña papel ida neébe krusial haforsa konsolidasaun ba paz no asegura estabilidade Estado Direito, promove resposabilizasaun no transparénsia públika, hodi aumenta konfiansa iha sistema katak iha Timor-Leste iha ona “justisa ba ema hotu”.
Diretora CFJ, Dra. Marcelina Tilman no Presidente Konselho Jestaun no Disiplina Advokasia, Dr. Nelinho Vital mos hatoó diskurso badak iha serimónia neé no lia fuan badak husi Dra. Ângela Carrascalão, reprezenta advogado graduado sira.

CFJ, 14 de Outubro de 2013