Dili-V Governu Konstituisional liu husi Ministeriu Justisa marka tan istoria foun ida iha Paiz ida neé tamba bele estabelese Estrutura Konselhu Jestaun Disiplina Advokasia iha Timor Leste hodi tau matan ba servisu Advogadu nian iha rai doben ida neé.

Tuir Ministru Justisa Dionisio Babo hateten katak ohin loron Timor Leste marka tan Istoria foun ida iha setor Judisial nian tamba durante neé la iha Konselhu ida atu bele tau matan ba servisu advogadu nian banhira atu fo assistensia legal ba ita nian povu neébe atu hetan justisa.

MJ fo Posse ba Membru Konselhu Jestaun Disipilina Advokasia hamutuk nain (7)membru ativu mak Prezidente Nelinho Vital,Antonio Gonsalves,Fernando Lopes,Manuel Tilman,Pedro Aparicio de Oliveira,membru supliente mak Fransisco dea Araujo Almeda,Elena Pereira.

“Durante neé la iha Konselhu ida atu tau matan ba servisu Advogadu nian tamba neé V Governu Konstituisional estabelese tan Konselhu Jestaun Disiplina Advokasia nian hodi tau matan ba ita nian advogadu privadu sira hodi fo assistensia legal ba ita nian povu neébe atu hetan justisa ”Dehan Ministru Justisa Dionsio Babo hafoin fo Posse ba Konselhu Jestaun Disiplina Advokasia iha Centro Formasaun Juridiku (CFJ) Caicoli Segunda (11/02).

Ministru mos informa tan katak Konselhu ida neé hamrik hetan tulun husi Govenru liu husi Ministeriu Justisa hodi fo finansieriu ba Konselhu ida neé mais ba futuru Konselhu ida neé mos bele sai hanesan Defensoria Publiku atu bele hetan Finanseiru husi Estadu hanesan mos Defensoria Publiku.

Iha fatin hanesan Prezidente Eleitu Konselhu Jestaun Disiplina Advokasia Timor Leste (CGDA) Nelinho Vital iha nian diskursu hateten katak atu garante bele toó hodi hetan objektivu hira neé, Konselhu Jestaun Disipilina Advokasia neé laos deit atu proteje advogadu nian direitu, maibe Konselhu mos iha obrigasaun kona ba oin nusa atu hare ba disipilina Advogadu nian.

“Tamba hanesan profisaun ida neébe ho karakter mesak, kestaun etika profesionalismu advogado sira tenki tau aás iha prestasaun servisu ba ita nia komunidade tuir lei no ordem ba ida neé,Konselhu hafoin halo tea posse ida neé sei hloa asaun hodi organiza funsionamentu advogado nain liu husi inskrisaun no ikus mai atu hasai kartaun identidade Advogadu nia”Dehan Prezidente CGDA Nelinho Vital.

Direitor DNAJL Nelinho Vital mos informa tan katak tuir Lei No.11/2008 Konselhu Jestaun Disiplina Advokasia neé ejisti banhira seidauk iha ordem do advogado tamba ida neé iha tempu ida neé nia laran ami sei servisu hamotuk ho governu liu-liu Ministeriu Justisa atu bele prepara lejislasaun ba estabelesementu ordem Advogadu nian.