MJ Aloka Pakote Referendum ba Emprezarios

MINISTERIU Justisa Sexta, (25/09) foin lalais ne’e aloka pakote referendum ne’ebé ho nia montante US$ 429,385.00 ba emprezario nain tolu (3) liu hosi assina kontratu iha Sala Reuniaun Ministeiru Justisa.

Emprezariu sira ne’e mai hosi kompaña Leo Atsabe Unipessoal, Lda Distritu Bobonaro, Kompaña Filcar Unipessoal hosi Dili no Kompaña Q-Nova Construction, Unipessoal hosi Dili.

Entre kompaña tolu (3) refere, Leo Atsabe Unipessoal,Lda hetan osan hosi pakote referendum ho nia mosntante US$ 175,000.00 hodi halo konstrusaun ba edifisiu Rejistu Notariadu nian iha Maliana Distritu Bobonaro.

Nune’e mos kompaña Filcar Unipessoal sei halo konstrusaun ba rezidensia Prezidente Tribunal Rekursu iha Dili ho nia Montante US$ 234,385.00 no Kompaña Q-Nova Construction, Unipessoal hetan osan ho nia montante US$ 20,000.00 hodi halo konstruksaun ba casa de banho iha prizaun Becora Dili.

Antes assina akordu ba pakote referendum Ministra Justisa, Lúcia Maria Brandão Freitas Lobato husu ba eprezariu sira ne’ebé assina ona kontratu ho governu atu hakás-an nune’e konstrusaun ne’ebé mak halo hosi kompaña sira bele remata iha tinan ne’e.

“Hau husu atu tinan ne’e ita haree los deit ba edifisiu Registu Notariadu ne’ebé mak iha distritu sira, nune’e iha aloka orsamentu ba tinan 2010 nian ita hodi haree los deit edifisiu Terras Propriedade no Servisu Kadastrais nian iha distritu,” dehan ministra ba emprezariu sira ne’ebé partisipa iha assina kontratu ba pakote referendum.

Atu kontrola servisu kompaña nian iha terenu Ministra justisa hateten, durante halo konstrusaun Ministeriu Justisa sei haruka funsionariu ministeiru nian hodi akompaña servisu iha vaze.

Iha fatin hanesan Prezidenti ba Assosiasaun dos Emprezarios de Timor Leste, Oscar Lima hateten, ne’e laos buat foun ba emprezarius, nudar emprezarius tenki tau konsiederasaun no tenki iha responsablidade.

“Hau husu imi nia konsiederasaun tanba pakote referendum ne’e laos buat halimar maibe ne’e importante. Ita mos labele atu prejuridika fali buat seluk, nune’e hau mos husu atu labele uza sub kontrak, nune’e bele hatene katak emprezariu sira iha duni nia responsablidade ba servisu ne’ebé governu fo fiar.” Dehan Oscar.

Nia mos husu atu emprezariu sira tenki tau sira nia konsiederasaun no responsablidade, no emprejariu sira mos labele atu buka manan barak.

Wainhira emprejariu sira mak buka manan barak hosi projetu ne’ebé sira lidera tuir Orscar Lima kompaña nia vida sei la naruk tanba ema sei la fo tan tender ba sira.



Ananias Babo Horta
Media Officer Ministeriu Justisa.
No Kontaktu : (670) 7348624